Tani qendra ciklonike gjendet diku mes territorit të Greqisë dhe Turqisë, megjithatë ajri i lagësht dhe jostabil ka mbetur në shtresat më të larta të atmosferës mbi rajonin tonë duke gjeneruar reshje të vazhdueshme atmosferike. Reshjet do të vazhdojnë edhe më tutje në Kosovë, Maqedoninë Veriore dhe lokalisht edhe në shumë rajone të Shqipërisë.
Reshjet do të jenë të intensitetit të ndryshëm deri në mbrëmje kur edhe pritet të fillojnë të dobësohen. Edhe pse gjatë mbrëmjes dhe natën reshjet do të ndërpriten kjo nuk do të thotë se nuk do të ketë më reshje atmosferike. Prapë priten reshje lokale dhe të herëpashershme në tërë rajonin, diku më shumë e diku më pak, kurse në disa rajone mund të ndërpritën tërësisht. Ndërkohë në anën tjetër nga Atlantiku kemi vorbulla të reja ciklonike të cilat do të zhvendosen në drejtim të Italisë dhe Mesdheut.
Këto masa ajrore jostabile do të prodhojnë lagështi e cila do të destabilizojë edhe më tutje atmosferën mbi rajonin tonë. Në këtë mënyrë nesër mund të kemi rrebeshe të herëpashershme shiu me vetëtima dhe bubullimë.
Mot mjaft jostabil do të mbajë në tërë Gadishullin Ballkanik ku përpos reshjeve të shiut do të ketë edhe rrebeshe të fuqishme shiu si dhe stuhi të fuqishme lokale me vetëtima, bubullimë dhe breshër./Meteoballkan
