Siç shihet në fotografinë kryesore mëngjesi i sotëm ishte i ftohtë, kurse ngrica të forta kishte në Rumani. Edhe pse ende netët do të vazhdojnë të jenë të ftohta tek ne ngrica nuk priten, vetëm me ndonjë përjashtim të vogël gjatë natës së sontme. Nga nesër masat ajrore pak më të nxehta me origjinë nga Afrika Veriore do të afrohen gjithnjë e më shumë rajonit tonë duke shkaktuar ngritje të ndjeshme të temperaturave.
Frontet atmosferike do të zhvendosen në veri të kontinentit, megjithatë një i tillë pritet të përfshijë rajonin tonë mbrëmjen e së hënës e deri në mëngjesin e së martës. Fillimisht në Shqipërinë jugore dhe jugperndimore pritet të fillojnë reshjet e shiut mbrëmjen e së hënës, kurse gjatë natës këto reshje atmosferike pritet të përfshijnë pjesët tjera të Shqipërisë, Maqedoninë e Veriut, Kosovën dhe Malin e Zi, ndërkohë që në jug reshjet do të ndërpiten. Reshjet vende-vende do të jenë të dendura por nuk do të zgjasin shumë, pra do të jenë afatshkurtëra. Nga dita e martë pritet ndërprerje e të reshurave në tërë rajonin dhe ngritje e temperaturave, por nuk përjashtohen rigat lokale të shiut. Nganjëherë dhe vende-vende do të ketë edhe erëra të fuqishme jugore dhe juglindore të cilat me vete do të sjellin edhe rërën apo pluhurin nga Shkretëtira e Saharasë e cila gjendet në Afrikën Veriore./Meteoballkan
