Fusha ajrore të paqëndrueshme do të depërtojnë në drejtim të rajonit tonë herë pas here gjatë javës që po hymë, duke kushtëzuar mot të ndryshueshëm por të nxehtë. Masat ajrore nga Afrika Veriore do të jenë dominante pothujase gjatë tërë javës duke kulmuar ditën e premte kur temperaturat mund të arrijnë dhe të tejkalojnë 25 gradë celsius.
Herë pas here priten edhe reshje shiu të cilat gjatë natës nga e hëna në të martën do të jenë gjithëpërfshirëse dhe vende-vende edhe të dendura. Gjykuar në përgjithësi më shumë do të dominojnë kthjellimet dhe rrezet diellore.
Pra, të hënën në tërë rajoni mot kryesisht pa reshje atmosferike por gjatë natës reshje të dendura shiu pritet të përfshijnë pothujase tërë rajonin tonë. Reshjet do të zgjasin deri në mëngjesin e së martës kur pritet të ndërpriten, ndërsa ditën e martë pritet të kemi erëra të fuqishme jugore dhe juglindore të cilat mund të arrijnë shpejtisë maksimale nga 60 deri në 70 km-h. Gjithashtu të martën vende -vende priten rrebeshe të izoluara shiu.
Nga e mërkura masat e nxehta ajrore afrikane do të depërtojnë edhe më shumë në drejtim të rajonit tonë duke ngritur temperaturat të cilat do të kulmojnë ditën e premte. Një front i fuqishëm i ftohtë ajror do të arrijë në fundjavë, front i cili do të shkaktojë ulje të temperaturave dhe mundësi edhe për reshje lokale atmosferike.
Informacione më të detajuara gjatë javës në meteoballkan.com./Meteoballkan