Java që po hyjnë do të karakterizohet me mot mjaft të ndryshueshëm si pasojë e depërtimit të masave ajrore të paqëndrueshme në rajonin tonë. Vende-vende priten edhe reshje atmosferike me intensitet të ndryshëm.
Ditëve të para të javës një vorbullë ciklonike nga Deti Adriatik do të rrugëtojë, përmes Gadishullin Ballkanik dhe do të stacionohet mbi Rumani ku si pasojë në drejtim të rajonit tonë do të depërtojnë masa të freskëta ajrore dhe herë pas here edhe reshje shiu. Rrebeshe shiu priten në Mal të Zi, veri, veriperëndim dhe shumë pjesë tjera të Shqipërisë. Reshje shiu në Kosovë priten gjatë natës nga e hëna në të martën si dhe të martën dhe të mërkurën vetëm vende-vende. Reshje lokale dhe kryesisht të dobëta shiu priten edhe të enjtën.
Më së paku reshje pritet të kemi në jug të Shqipërisë, Kosovës si dhe në shumicën e territorit të Maqedonisë së Veriut. Të premtën sipas ecurive aktuale pritet të kemi stabilizim afatshkurtër të motit dhe ngritje të temperaturave, kurse për fundjavë sipas ecurive aktuale sinoptike pritet të kemi destabilizim të fuqishëm të motit me reshje të dendura shiu, ulje të temperaturave, reshje bore në viset malore si dhe mundësi për paraqitje të reshjeve të borës edhe në viset e ulëta.
Pra, parashikimi për fundjavën e ardhshme shikuar ecuritë aktuale sinoptike duket sikur të jetë joreal duke pasur parasysh periudhën kohore në të cilën gjendemi. Megjithatë kështu thonë modelet globale kompjuterike për parashikim të motit dhe të shpresojmë që kjo të ndryshojë ditëve të ardhshme./Meteoballkan
