Masat ajrore arktike siç duket nuk e kanë ndërmend të dorëzohen këtë vit. Shumë pjesë të Evropës posaçërisht viset kodrinore malore janë përfshirë nga reshje të dendura bore ditëve të fundit.
Që nga Zvicra, pastaj Gjermania jugore, Italia veriore, Austria jugore e deri në Kroaci dhe sonte edhe në Mal të Zi. Viset kodrinore-malore të këtyre rajoneve përsëri do të kenë reshje bore si pasojë e depërtimit të vazhdueshëm të masave ajrore ciklonike dhe të ftohta me origjinë nga Arktiku.
Natyra siç duket po e bënë balancin pas një Shkurti dhe Marsi mjaft të nxehtë në këto pjesë të globit tonë. Ditëve dhe netëve të ardhshme reshje shiu priten edhe në Shqipëri dhe Kosovë, kurse në viset më të larta malore mund të paraqiten edhe reshjet e borës.
Reshje më intensive shiu priten në veriperëndim të Shqipërisë, kurse në viset tjera priten riga apo rrebeshe kryesisht të izoluara shiu, vende-vende edhe me vetëtima dhe bubullimë.
