Shumë pyetje kemi në adresën tonë se kur do të ketë përmirësim afatgjatë të motit dhe nggritje afatgjata të temperaturave. E po përgjigje nuk mund të japim një herë për një herë sepse situata sinoptike është mjaft e komplikuar dhe masat e nxehta ajrore me origjinë nga Afrika veriore nuk mund të depërtojnë tek ne për shkak të masave të fuqishme ajrore jostabil me origjinë Atlantiku. Kjo gjendje sinoptike do të zgjasë të paktën deri në fundjaven e ardhshme, ku ka disa indikacione se mund të ketë një zgjim të Afrikes dhe ngritje të temperaturave tek ne.
Megjithatë, nuk mund të themi se ky është një fakt i sigurt sepse parashikimi sa më i gjatë në afat kohor është më i pasaktë. Është një situatë mjaft e favorshme sinoptike e cila na pret javën e ardhshme sepse ka shumë rajone në Kosovë ku thatësia mbizotëron ende për shkak të reshjeve shumë të pakta atmosferike. Vetëm të shpresojmë që të mos ketë dëme nga ndonjë shtrëngatë eventuale e cila eventualisht mund të sjellë erëra të fuqishme apo breshër.
Pra, “zgjimi”i Afrikes veriore dhe drejtimi i “antenave të nxehta” të Afrikes në drejtim të rajonit tonë sipas ecurive aktuale pritet të ndodhë afërsisht rreth dates 20 të këtij muaji, nëse eventualisht nuk ndodh ndonjë ndryshim në gjendjen sinoptike natyrisht. Deri atëherë na pret një mot shumë i ndryshueshëm ku përfshihen : periudha të shkrurtra të nxehta, periudha të shkurtra me intervale kohore me diell , periudha shumë më të gjata të freskëta dhe me vranësira si dhe periudha edhe me reshje atmosferike të cilat herë pas here dhe vende -vende do të jenë të intensitetit të lartë.
