Nesër në tërë rajonin tonë pritet të kemi shtim të konsiderueshëm të vranësirave, ndërsa gjatë ditës do të fillojnë edhe reshjet e shiu. Reshjet e shiut do të fillojnë fillimisht në Shqipëri ku priten edhe rrebeshe lokale shiu me vetëtima dhe bubullimë. Pasdite reshjet do të përfshijnë edhe shumë pjesë të Kosovës dhe Maqedonisë së Veriut. Përpos reshje të shiut, vende-vende priten edhe rrebeshe lokale shiu me vetëtima dhe bubullimë.
Reshjet dhe rrebeshet lokale të shiut me vetëtima dhe bubullimë do të vazhdojnë edhe gjatë natës dhe të hënën. Më së paku reshje priten në lindje të Kosovës sipas ecurive aktuale.
Të martën në tërë rajonin pritet të kemi mot mjaft jostabil, me ndonjë interval të shkurtër kohor me diell dhe pastaj me zhvillim të fuqishëm të vranësirave vertikale apo konvektive të cilat do të sjellin rrebeshe të fuqishme shiu me vetëtima bubullimë dhe mundësi edhe për breshër.
Mot i ngjashëm do të mbajë deri ditën e shtunë kur pritet të kemi dobësimin dhe largimin e ciklonit të fuqishëm nga rajoni ynë. Pra, nga nesër moti në tërë rajonin tonë do të karakterizohet me reshje të shpeshta shiu, herë pas here rrebeshe të fuqishme shiu me vetëtima dhe bubullimë, erëra të fuqishme gjatë shtrëngatave eventuale si dhe mundësi edhe për breshër. Reshjet e verës nuk do të jenë të shpërndara barabartë, pra në disa rajone mund të ketë reshje të shumta të cilat mund të rezultojnë edhe në vërshime, kurse në rajone tjera mund të ketë reshje më të pakta./Meteoballkan
