Në Shqipëri dhe Kosovë ende po vazhdojnë erërat e ngrohta nga deti ku vende -vende kanë filluar rrebeshet e shiut, ndërkohë në rajon në veri dhe veriperëndim kanë depërtuar temperaturat polare me reshje të dendura bore.
Sistemi i reshjeve po lëviz në drejtim të vendeve tona dhe së pari do të arrijë në veri të Malit të Zi dhe Kosovës. Deri në ardhjen e frontit do të vazhdojnë erëra jugore dhe reshje shiu. Me ardhjen e frontit do të fillojnë të fryjnë erëra veriore dhe shiu do të shndërrohet në borë, ndërkaq temperaturat më të ulëta përfshijnë vendet tona gjatë natës (në foto me ngjyrë të kaltër).
Bora do të fillojë në Kosovë orëve të mbrëmjes më vonë, ndërsa në Shqipëri gjatë natës në verilindje e të shtunën në pjesët tjera të vendit. E kemi fjalën për Shqipërinë kontinentale, por mund të ndodhë që fjolla bore të ketë edhe në Shkodër dhe Lezhë, lokalisht edhe në ndonjë rajon tjetër mesdhetar, por në përgjithësi në viset mesdhetare priten vetëm reshje shiu.
Edhe në Maqedoninë Veriore bora do të fillojë vonë gjatë natës ose eventualisht orëve të hershme të mëngjesit të së shtunës, ndërsa në Luginën e Preshevës bora pritet të fillojë afër mesnatës.
Të shtunën bardhësi e pafund në shumë vise tona, ndërsa do të jetë një ditë tipike dimërore dhe asgjë ekstreme nuk pritet të ndodhë. Në viset kodrinore-malore erërat e forta mund të krijojnë orteqe bore.
Reshjet më të dendura të borës parashihen në viset kodrinore-malore të Shqipërisë veriore-verilindore dhe lindore si dhe në perëndim e veriperëndim të Maqedonisë së Veriut, por duke mos anashkaluar edhe Kosovën dhe Shqipërinë juglindore e shumë vise malore të Shqipërisë qendrore e zona tjera malore.
Nga e diela reshjet pushojnë dhe priten kthjellime e acar në orët e mëngjesit. Temperaturat ditore shënojnë rritje gjatë javës së re, por fronte të reja të ftohta kryesisht të thata mund të pengojnë rritjen e temperaturave dhe në këtë mënyrë bora mund të jetë e qendrueshme në shumë rajone për shumë ditë./MeteoBallkan