Edhe disa orë na ndajnë nga ndryshimi drastik i kushteve të motit si pasojë e ardhjes së një cikloni të fuqishëm nga veriu i Kontinentit. Ky ciklon mjaft i fuqishëm do të zhvendoset drejt Karpateve të Rumanisë duke kushtëzuar ndryshim të madh të motit edhe në rajonin tonë.
Gjatë paradites dhe mesdites priten erëra nga jugu dhe jugperëndimi si dhe rrebeshe e reshje shiu, vende-vende intensive dhe të shoqëruara me rrebeshe me vetëtima dhe bubullimë. Në mbrëmje cikloni shkon drejt Karpateve dhe në rajonin tonë do të vendosen rrymime të forta ajrore nga veriu të cilat gjatë natës do të fuqizohen duke kushtëzuar ulje të ndjeshme të temperaturave. Temperaturave të ftohta do i u paraprijë fronti i fuqishëm i ftohtë që vjen pasdite ose në mbrëmje. Reshjet e shiut në disa vise do të përzihen me borë, ndërsa në viset malore priten reshje të dendura bore. Gjatë natës reshje ndërpriten, por vazhdojnë erërat e fuqishme veriore.
Orët e pasdites së të hënës shkurtimisht mund të ketë qetësim të motit, por kjo do të jetë qetësi para stuhisë së mbrëmjes ose natës.
Të martën erërat e ftohta veriore fuqizohen edhe më shumë dhe lokalisht priten rrebeshe afatshkurtra shiu, breshëri të imët e bore që mund të shoqërohen edhe me ndonjë bubullimë. Erërat e fuqishme pritet të qetësohen në mbrëmjen e vonshme të së martës.
Mëngjesi i së mërkurës fare lehtë mund të jetë me acar, ngase parashihet kthjellim i motit gjatë natës, por të shpresojmë që do të ketë vranësira të pjesshme që është e mundshme.
Nga e mërkura qetësim dhe përmirësim i motit, megjithatë priten vranësira dhe në ndonjë rajon riga të dobëta shiu.
Pra, pas disa ditëve pranverore na presin dy ditë jashtëzakonisht të paqëndrueshme dhe e marta mund të themi edhe dimërore, edhe pse nuk priten reshje bore në tërë territorin./METEOBALLKAN