Ardhja e ajrit shumë të nxehtë me origjinë nga Afrika veriore ose nga jugu dhe jugperëndimi në njërën anë dhe në anën tjetër vjen ajri i freskët jo-stabil nga veriperëndimi me origjinë nga Atlantiku dhe aty ku takohen këto dy masa ajrore krijohet potencial për formimin e stuhive të fuqishme konvektive që do të prodhojnë rrebeshe intensive shiu, breshër, erëra të fuqishme dhe shkarkesa intensive atmosferike.
Kjo pritet të ndodhë sonte në Slloveni ku nga Alpet kemi zbritjen e ajrit të ftohtë dhe të paqëndrueshëm.
Stuhi të fuqishme së pari priten në Slloveni, pastaj edhe në Kroaci, veri dhe lindje të Bosnjës dhe Hercegovinës dhe Serbi. Nga Serbia do të kalojnë në Rumani duke anashkaluar përsëri territoret tona.
Përderisa territoret tona ditëve të ardhshme do të jenë nën ndikimin gati konstant të temperaturave të larta jo shumë larg në veri priten zhvillime të stuhive të fuqishme verore gjatë dy tri ditëve të ardhshme. Ndonjë stuhi e izoluar mund të arrijë edhe në Kosovë, por instabilitetet kryesore priten në shtetet që i përmendëm më lartë.
Për shkak të dallimit të madh në temperatura dhe faktorëve tjerë do të ketë gjasa për krijimin e shumë stuhive “superqelizore” që mund të prodhojnë edhe tornado.
Në viset tona njëherë për njëherë nuk priten stuhi të mëdha, por nëse ndodhë ndonjë ndryshim eventual do tju njoftojmë me kohë. Më së shumti nga këto stuhi që priten tri ditët e ardhshme do të goditet Kroacia, pastaj pjesë të Sllovenisë, Serbisë dhe Bosnjës e Hercegovinës./METEOBALLKAN
