Reshje të reja bore vijnë në rajonin tonë duke filluar nga sonte, ngase kemi një front të ri të ftohtë ajror drejtëpërdrejt nga veriilindja/lindja e Kontinentit. Ky front i ftohtë ajror vjen si pasojë e gjendjes sinoptike: anticiklonit të fuqishëm ruso-siberik i cili me një bërthamë të tijë pritet të zhvendoset drejt Polonisë dhe nga Polonia drejt rajonit tonë. Në anën tjetër kemi ciklonin e fuqishëm në Turqi i cili po kushtëzon reshje bore atje dhe rajonit të gjerë rreth Detit të Zi. Ky kombinim i gjendjes sinoptike na afron shumë rreth bërthames së fuqishme të ajrit esktremisht të ftohtë ajror nga Siberia. Kjo bërthamë pritet të përfshijë Ukrainen dhe rajonet rreth Detit të Zi, por pjesërisht edhe rajonin tonë.
Reshjet e borës nuk pritet të jenë të forta nëpër ultësira, por priten intervale reshjesh të dendura veçanërisht në viset kodrinore-malore kur priten kushte të vërteta dimërore. Edhe nëpër ultësira (jo në të gjitha) priten intervale reshjesh bore dhe mund të krijohen edhe shtresa simbolike bore. Reshjet e borës pritet të fillojnë sonte lokalisht për tu zgjeruar gjatë natës dhe për të vazhduar edhe gjatë ditës së nesërme dhe pritet të përfshijnë viset tona kontinentale.
Pas ndërprerrjes së reshjeve do të pasojë kulminacioni i acarit të fortë Siberik nga e premta deri të dielën ku temperaturat minimale pritet të ulen deri në -10 me mundësi edhe deri në -12 gradë Celsius nëpër disa ultësira, ndërsa deri në -15 gradë Celsius në viset më të thella malore. Acari do të jetë i fortë sidomos gjatë natës dhe orëve të hershme të mëngjesit. Të dielën gjatë ditës shpresojmë të ndjejmë zbutjen e acarit të fortë siberik./MeteoBallkan
