I ftohti Arktik ka filluar të depërtojë edhe në Evropën perëndimore pas Skandinavisë dhe gjatë fundit të kësaj jave do të kemi ciklonin më të ri Gjenovian të stacionuar pastaj në pjesët qendrore të Italisë dhe Detit Adriatik. Ky ciklon do të krijohet si pasojë e depërtimit të një mase të madhe ajrore të ftohtë me origjinë arktike në Mesdheun e ngrohtë.
Reshje bore priten në shumë pjesë të Francës dhe Gjermanisë, madje edhe në veri dhe verilindje të Spanjës. Tutje reshje më të dendura shiu e bore në disa nga pjesët qendrore të Evropes si në Austri dhe pjesë të Zvicrës.
Ballkani me reshjet e para serioze të borës nëpër ultësira, viset tona ende nuk përfshihen.
Përderisa në Francë dhe Gjermani reshjet do të jenë kalimtare ndryshe do të jetë nga Sllovenia deri në veriun e Malit të Zi kur priten reshjet e para serioze në të gjitha ultësirat e Sllovenisë, Kroacisë dhe Bosnjës e Hercegovinës ku do të jetë edhe kufiri i depërtimit të ajrit të ftohtë polar me reshje bore.
Të dielën një sasi e këtij sistemi të ftohtë ajror do të depërtojë edhe në Kosovë dhe veri të Shqipërisë, por reshjet e borës ende janë të diskutueshme. Reshje bore gjithsesi priten në viset kodrinore-malore në veri dhe verilindje të Shqipërisë dhe disa pjesë të Kosovës, por për momentin nuk duket se mund të kemi ndonjë atmosferë të fortë dimërore.
Arsyeja se në viset tona do të kemi vetëm reshje shiu gjendet në faktin se do të jemi në sektorin e nxehtë të masave të fuqishme ajrore ciklonike me rrymime intensive ajrore nga jugu e jugperëndimi, ndërsa nga Sllovenia deri në veri të Malit të Zi do të jenë në sektorin e ftohtë të masave ajrore ciklonike me rrymime ajrore nga veriu e verilindja.
Pozicionimi dhe shtrirja e ciklonit të fuqishëm dimëror në qendër të Detit Adriatik e determinon një gjendje të tillë sinoptike, pra shtetet si Kroacia dhe Bosnja e Hercegovina do të përfitojnë reshjet më të dendura të borës edhe nëpër ultësira, ndërsa Shqipëria dhe Kosova përfitojnë vetëm reshje shiu. Të Dielen ajri i ftohtë Arktik depërton edhe në Kosovë por sipas të gjitha gjasave në një formë paksa më të dobët dhe afatshkurtër.
Deri atëherë reshje të reja shiu të shpeshta të cilat mund të vështirojnë gjendjen edhe ashtu të vështirë në zonat e prekura nga përmbytjet e ditëve të fundit. Reshje dukshëm më intensive priten në Shqipëri.
Ky ciklon do të jetë përgjegjës për reshje të reja intensive në shumë pjesë të Ballkanit dhe ne do të jemi duke ndjekur evoluimin e zhvillimit të ciklonit dhe pasojave të tij./MeteoBallkan
