Sot në Kosovë pritet të mbajë mot me intervale kohore me diell dhe shtim të vranësirave. Do të jetë më ftohtë për shkak të erërave verilindore që lajmërojnë afrimin e ciklonit dhe reshjet e borës. Pasdite vonë priten reshje lokale në disa rajone shiu e bore, ndërsa orët e natës pritet që reshjet e borës të fillojnë në shumë pjesë të Republikës së Kosovës.
Në Shqipëri pritet të mbajë mot me intervale kohore me diell dhe vranësira lokale. Pasdite vonë dhe në mbrëmje do të fillojnë reshjet e shiut dhe borës të cilat do të intensifikohen gjatë natës. Reshje të dendura bore priten në juglindje të vendit dhe në viset më të larta në jug të vendit. Reshje bore priten edhe në lindje dhe veri të vendit. Në viset tjera reshje të dendura shiu. Reshjet e borës gjatë natës nesër pritet të përfshijnë edhe veriun e Malit të Zi, shumë vise në perëndim të Maqedonisë së Veriut dhe po ashtu edhe shumë vise të Luginës së Preshevës.
Të dielën na pret mot plotësissht i vranët dhe me reshje shiu e bore. Skenar i vërtetë dimëror pritet në juglindje, lindje dhe veri të Shqipërisë, veri të Malit të Zi, viset pak më të larta të Maqedonisë së Veriut dhe Kosovës. Nëpër ultësira herë pas here priten shndërrimi i reshjeve të borës në reshje shiu.
Moti i ftohtë do të vazhdojë edhe të hënën dhe të martën, por reshjet do të vijnë duke u dobësuar dhe izoluar. Priten intervale kohore me diell, vranësira dhe vetëm vende-vende reshje të herëpashershme bore. Në përgjithësi nuk pritet ndonjë i ftohtë i madh dhe se temperaturat pritet të jenë nën vlera mesatare (por jo shumë) për këtë periudhë kohore. Dimri do të ndjehet veçanërisht në viset kodrinore-malore./MeteoBallkan
