Kjo javë filloi me stuhi të izoluara shiu dhe ulje të temperaturave. Ishte kjo ndërprerje e vapës e cila gjatë kësaj vere ka qenë persistente.
Stuhitë e shiut u shoqëruan me breshër dhe në disa zona shkaktuan dëme të konsiderueshme sidomos në kulturat bujqësore. Vlen të përmendet fshati Gaçkë i Komunës së Ferizajit banorët e të cilit fshat nuk mbajnë mend të ketë rënë breshër i tillë me dekada. Breshër intensiv pati edhe në fshatra të Komunës së Gjakovës, Gjilanit, Rahovecit dhe në Brezovicë ku ra një sasi shumë e madhe breshëri. Breshër ra edhe në disa zona tjera të izoluara.
Stuhia solli reshje shiu e rrebeshe lokale me vetëtima dhe bubullimë, por si zakonisht disa rajone mbetën me fare pak reshje sidomos rajoni i Llapit dhe ndonjë rajon tjetër, prandaj gjendja me thatësinë ekstreme mbetet mjaft shqetësuese.
Sistemi i fuqishëm ciklonik që solli këtë ndryshim të motit tani po largohet nga viset tona dhe atmosfera po stabilizohet gradualisht, edhe pse ende ka mbetje të ajrit jo-stabil me mundësi për ndonjë reshje apo rrebesh të izoluar shiu. Rrebeshet e shiut të Martën janë zhvendosur më shumë në disa vise të Shqipërisë në jug dhe qendër.
E Mërkura pritet të jetë me mot me diell, por ende jo plotësisht të qëndrueshëm. Përpos rrezeve diellore do të ketë vranësira lokale, madje në disa zona ende priten ndonjë rigë ose rrebesh lokal shiu, por temperaturat do të fillojnë të rriten përsëri gradualisht.
Gradualisht vjen vala më e nxehtësisë.
Nga e Enjta masa ajrore anticiklonike fuqizohet mbi rajonin duke kushtëzuar stabilizim pothuajse të plotë të atmosferës dhe kthjellime të plota. Po ashtu nga Afrika veriore dhe Evropa do të fillojë të depërtojnë masa më të nxehta ajrore dhe kjo mund të jetë fillimi i një vale më të re nxehtësie që mund të zgjasë disa ditë, madje edhe javë.
Fundjava sjellë mot me diell dhe mjaft të nxehtë veror, me temperatura në Kosovë deri në 35 gradë Celsius, ndërsa në Shqipëri dhe Maqedoninë Veriore edhe më nxehtë./MeteoBallkan
