Sot në Kosovë pritet të mbajë mot i ndryshueshëm. Paradite dhe gjatë ditës vende-vende priten intervale kohore me diell dhe erëra lokalisht të fuqishme nga jugu dhe juglindja, ndërsa në veriperëndim të vendit riga shiu. Pasdite priten rrebeshe shiu, lokalisht me vetëtima dhe bubullimë, ndërsa në orët e mbrëmjes ose natën reshje shiu priten në tërë territorin. Në viset malore reshje bore, ndërsa reshje bore mund të ketë edhe në veri-verilindje të vendit.
Në Shqipëri, Maqedoninë Veriore, Mal të Zi dhe Kosovën lindore pritet të mbajë mot i ndryshueshëm. Reshje të dendura priten në Mal të Zi.
Pasdite ose në mbrëmje pritet që atmosfera të destabilizohet edhe në Shqipëri ku priten rrebeshe lokalisht të fuqishme shiu me vetëtima dhe bubullimë. Në Maqedoninë Veriore dhe Luginën e Preshevës pritet mot kryesisht i thatë deri në orët e mbrëmjes.
Të hënën na pret mot i paqëndrueshëm, me vranësira dhe herë pas here me reshje lokale shiu. Vende-vende priten rrebeshe lokale shiu me vetëtima dhe bubullimë, ndërsa në viset malore priten reshje bore.
Përderisa në viset tona priten reshje shiu, fronti i fuqishëm me ajrin e ftohtë polar do të arrijë në Ballkan, konkretisht në Bosnjë dhe Hercegovinë, jugperëndim të Serbisë, veri të Malit të Zi dhe Kroaci e Slloveni ku priten reshje mjaft të dendura bore.
Ditëve të ardhshme na pret mot i ndryshueshëm dhe i paqëndrueshëm, me reshje të herëpashershme shiu e bore në viset kodrinore-malore. Ka gjasa që reshje shqote e bore nganjëherë të ketë edhe në disa zona më të ulëta në Kosovë./MeteoBallkan
