Gjatë kësaj jave do të kemi mot më të ftohtë dhe më të ndryshueshëm në krahasim me javën pranverore që lamë pas.
Një ciklon i cili do të stacionohet në Mesdhe, pak përtej Italisë do të ketë ndikim të madh në kushtet e motit gjatë kësaj jave në territoret tona, ndërkohë që anticikloni i fuqishëm me qendër në Britaninë e Madhe, nganjëherë do të na sjellë intervale kohore me diell.
Në aspektin termik, edhe pse do të jetë më ftohtë nuk priten ulje të theksuara të temperaturave, por ndonjë natë mund të kemi “minuse” afërsisht deri -2 ose -3 gradë Celsius në zonat kontinentale dhe kjo do të varet nga kthjellimi eventual i motit. Temperaturat maksimale gjatë kësaj jave pritet të luhaten nga 8 deri në 15 gradë Celsius.
Në përgjithësi gjatë kësaj jave vranësirat do të jenë prezente më shumë se intervalet kohore me diell ku herë pas here do të ketë reshje lokale shiu si dhe ndonjë rrebesh lokal shiu me vetëtima dhe bubullimë. Në viset malore priten reshje të herëpashershme lokale bore, ndërsa nuk përjashtohet mundësia që reshje shqote e bore të ketë edhe në disa zona më të ulëta në territorin e Republikës së Kosovëa.
Pra, para nesh një javë me mot me shumë vranësira dhe reshje të herëpashershme, lokale shiu, reshje lokale bore në viset malore dhe nganjëherë rrallë priten edhe intervale kohore me diell. Në fundjavë mund të kemi një front paksa më të fuqishëm të ftohtë ajror që eventualisht do të kushtëzojë reshje bore paksa më të përhapura, por kjo mbetet të shihet. Temperaturat do të shënojnë ulje të mëtutjeshme në fundjavë.
Ishte ky parashikimi javor me pak fjalë. Ndryshime të vogla në parashikim mund të ketë. Për çdo ndryshim eventual do të njoftoheni me kohë në postimet tona të përditshme./MeteoBallkan
