Depresioni i fuqishëm ciklonik i krijuar ditëve të fundit në Italinë veriore shkaktojë përkeqësim dramatik të motit në shumë pjesë të Evropës. Fatmirësisht për rajonin tonë këto masa ajrore nuk ishin të drejtuara në drejtim të Kosovës, por kishin rrugëtim nga jugperëndimi në drejtim të verilindjes pra nga Italia veriore në drejtim të Sllovenisë e tutje. Sot masat e paqëndrueshme dhe jashtëzakonisht jo-stabile ajrore kanë përparuar pak në drejtim të jugut dhe juglindjes, por përsëri rrymat ajrore nuk favorizojnë ardhjen e tyre tek ne.
Sot ngjarjet kryesore do të zhvillohen në Italinë qendrore, pastaj në Kroaci dhe në mbrëmje edhe në Bosnjë dhe Hercegovinë e tutje në drejtim të Hungarisë. Gjatë natës stuhi me vetëtima dhe bubullimë mund të përfshijnë Malin e Zi, kurse gjatë orëve të mëngjesit edhe veriun e Shqipërisë, por gjithsesi këto stuhi në rajonin tonë do të jenë shumë më të dobëta dhe më të izoluara krahasuar me vendet e lartcekura. Në shumicën e territorit nuk do të ketë reshje fare sepse fronti parashihet edhe më i dobët se që ishte i paraparë Karakteristikë kryesore e këtij fronti tek ne do të jetë ulja e temperaturave dhe erëra, fillimisht të nxehta nga jugperëndimi, perëndimi e pastaj të freskëta nga veriu dhe verilindja.
Ditëve të fundit ishim dëshmitarë të motit dramatik që nga Spanja, Franca, pjesë të Gjermanisë e veçanërisht Italia veriore dhe Sllovenia, por fatmirësisht ky sistem i fuqishëm nuk e kishte rrugën në drejtim të Kosovës edhe ashtu të goditur shpeshherë gjatë kësaj vere. Në rajonet Alpine italiane dhe franceze kishte edhe reshje të dendura bore, kurse nëpër ultësira temperatura ra aq shumë sa që duket sikur vjeshtë e vonshme. Temperatura në disa qytet evropiane ra deri në 10 gradë Celsius, kurse në Gadishullin Ballkanik shumë afër nesh ajo ishte afër 40 gradë Celsius. Pikërisht ky dallim i madh dhe kontakti mes temperaturave të larta dhe të ulëta ishte shkak për këtë mot aq ekstrem.
Sidoqoftë Shtatori sipas ecurive më të fundit sinoptike na premton edhe shumë ditë të mira veriore, pas kalimit të këtij fronti i cili do të vije nesër pasdite në Kosovë.
