Spanja është duke u përballur me një nga katastrofat më të rënda në historinë e saj, teksa mbi 200 persona kanë vdekur nga përmbytjet.
Por çfarë e shkaktoi këtë tragjedi natyrore dhe cili është impakti i fenomenit “Dana”?
Sipas ekspertëve, së pari, vendi ka vuajtur nga një thatësirë për gati dy vjet, që do të thotë se toka ishte lënë e vështirë dhe e paaftë për të thithur reshjet. Pra, kur shiu i një vitit ra një ditë, çoi në përmbytje ekstreme. Në zonën e Valencias, në Chiva, ra më shumë shi në tetë orë sesa në 20 muajt e mëparshëm.
Kjo u shkaktua nga një sistem moti shkatërrues i njohur lokalisht si DANA, ose depresioni i izoluar në shkallë të lartë. Ngjarje të tilla të motit ndodhin kur ajri i ftohtë dhe i ngrohtë takohen dhe prodhojnë re të fuqishme shiu.
Ndonjëherë kjo mund të shkaktojë stuhi të mëdha breshëri dhe tornado. DANA e kësaj jave ishte një nga tre stuhitë më intensive të shekullit të kaluar në rajonin e Valencias.
Kur ajri i ftohtë fryn mbi ujërat e ngrohta të Mesdheut, ai bën që ajri më i nxehtë të ngrihet shpejt dhe të formojë re të dendura, të mbushura me ujë që mund të qëndrojnë mbi të njëjtën zonë për shumë orë, duke rritur potencialin e tyre shkatërrues. Ngjarja ndonjëherë provokon stuhi të mëdha breshëri dhe tornado, siç janë parë këtë javë, thonë meteorologët.
Spanja Lindore dhe Jugore janë veçanërisht të ndjeshme ndaj fenomenit për shkak të pozicionit të saj midis Oqeanit Atlantik dhe Detit Mesdhe. Masat ajrore të ngrohta dhe të lagështa dhe frontet e ftohta takohen në një rajon ku malet favorizojnë formimin e reve të stuhisë dhe reshjeve.
DANA e kësaj jave ishte një nga tre stuhitë më intensive të shekullit të kaluar në rajonin e Valencias, tha Ruben del Campo, zëdhënës i agjencisë kombëtare të motit Aemet.
“Parashikimet ishin në përputhje me atë që ndodhi. Por në një zonë midis Utiel dhe Chiva, në provincën e Valencias, reshjet i kaluan 300 litra për metër katror. Në atë zonë, sistemet e stuhive u formuan dhe rigjeneroheshin vazhdimisht,” shpjegoi ai.
Ndërsa ekspertët thonë se do të duhet kohë për të analizuar të gjitha të dhënat për të përcaktuar nëse DANA e veçantë u shkaktua nga ndryshimet klimatike, shumica pajtohen se një rritje e temperaturës në Mesdhe dhe kushtet atmosferike më të ngrohta dhe më të lagështa kontribuojnë në prodhimin e episodeve ekstreme më të shpeshta.
Përpara se termi DANA të krijohej në fillim të viteve 2000, çdo reshje e madhe në vjeshtë, karakteristikë e klimës mesdhetare, përdorej me emrin popullor “gota fria” (pika e ftohtë) në Spanjë dhe pjesë të Francës. Termi përdoret ende gjerësisht.
