Nesër në Kosovë pritet mot pak më i ndryshueshëm. Në mëngjes dhe paradite plotësisht i kthjellët dhe i nxehtë. pasdite nga veriu e veriperëndimi parashihen disa zhvillime që do të kushtëzojnë rrebeshe lokale shiu me vetëtima dhe bubullimë. Disa rrebeshe mund të zhvillohen edhe në pjesët qendrore, por të gjitha do të jenë të karakterit lokal. Erërat veriore do të fuqizohen orëve të pasdites dhe do sjellin pak freski vende-vende së bashku me reshjet lokale.
Temperaturat parashihet të luhaten nga 17 minimalja deri në 35 ajo maksimale.
Në Shqipëri, Maqedoninë e Veriut, Luginë të Preshevës dhe Mal të Zi nesër pritet të mbajë mot me diell dhe shumë i nxehtë veror. Pasdite në Mal të Zi priten rrebeshe lokale shiu me vetëtima dhe bubullimë. Në viset tjera nxehtë dhe me diell.
Mot pak më i freskët na pret të enjten në Kosovë me ulje të lehta të temperaturave, megjithatë nuk priten reshje, përpos disa zonave të izoluara. Në pjesët qendrore e jugore të Shqipërisë priten zhvillime të stuhive lokale të shiut me vetëtima dhe bubullimë, ashtu sikurse edhe në disa vise në Maqedoninë Veriore. Temperaturat do të vazhdojnë të jenë të larta në pjesën perëndimore të Shqipërisë për tu freskuar shkurtimisht vetëm në viset e zhvillimeve konvektive.
Edhe dita e Premte do të jetë e kthjellët në Kosovë, kurse stuhi të fuqishme shiu mund të zhvillohen në juglindje-jug e deri te pjesët qendrore të Shqipërisë orëve të pasdites. Stuhi të izoluara priten edhe në jugperëndim të Maqedonisë së Veriut.
Fundjava vjen paksa më e freskët, në Kosovë e thatë dhe me diell e në jug e perëndim të Shqipërisë pritet freskim dhe rrebeshe lokale./MeteoBallkan
