Duke lexuar lajmet e ditëve të fundit, secili shqetësohet rreth koronavirusit dhe implikimeve që mund t’i paraqesë për miliarda njerëz kudo në botë. Koronavirusi është duke u shpërndarë me shpejtësi nëpër botë, duke detyruar kufizimin e lirisë në qytete të mëdha, si dhe duke detyruar mbylljen e bizneseve dhe pezullimin e aktiviteteve në vendet e prekura.
Disa vende vende duket se tashmë kanë arritur ta vënën nën kontroll përhapjen e virusit, siç është Kina dhe Koreja Jugore, por disa shtete të tjera, siç janë Italia dhe Irani, janë duke përjetuar rritje të shpejtë të pacientëve të prekur nga virusi, ndërkaq shumë vende të tjera janë duke u munduar që të parandalojnë rrezikun nga shtrirja e tij.
MeteoBallkan ka vendosur që të raportojë edhe për koronavirusin, për shkak të kontributit informativ që mund ta japë në një periudhë paniku si kjo, si dhe për arsye që besohet se temperaturat kanë impakt të drejtpërdrejtë në performancën e virusit.
Siç shkruan windy.com, përhapja aktuale e COVID-19, shënon incidente më të shpeshta në vendet me ambient më të thatë dhe më të ftohtë se sa në vendet ku ka lagështi dhe ngrohtësi më të lartë. Për shembull, në Japoni është pritur që virusi do të shpërndahet në qytetet e mëdha të saj siç është Tokio, për shkak të vizitorëve të shumtë dhe popullatës së madhe, por nuk ka ndodhur kështu. Virusi është shpërndarë në Hokkaido, përkundër se ka një shkallë shumë më të ulët të vizitorëve. Megjithatë, në Hokkaido, kushtet meteorologjike janë të përshtatshme për virusin, ngase është vend më i thatë dhe ka më pak lagështi. E njëjta vlenë edhe për Italinë. Veriu i vendit është dukshëm më i prekur se jugu.
Tashmë në Twitter po diskutohet rreth mundësisë që koronavirus të jetë sezonal. Jeromme Ross ka publikuar një hartë që paraqet shtrirjen e koronavirusit në një korridor me kushte të ngjashme klimatike, ku zotëron i ftohti dhe thatësia.
This very interesting finding hints at the potential seasonality of Coronavirus: community-to-community outbreak has so far been limited to “a narrow east-west distribution roughly along the 30-50 N” corridor at consistently similar weather patterns (5-11°C and 47-79% humidity).” pic.twitter.com/ZCRbdEoWtf
— Jerome Roos (@JeromeRoos) March 8, 2020
Faqja e njohur shkruan se ka shumë viruse të familjes korona, të cilat kanë predispozita të zhdukjes kur kilma është më e nxehtë. Kjo është arsyeja pse shumë njerëz besojnë se ky është rasti edhe me COVID-19. Se a do të jetë shpëtimi nga koronavirusi ngrohja e kohës me ardhjen e stinës pranverore, mbetet të shihet, por shumica e ekspertëve pajtohen që, përkundër gjasave që të ndodh kështu, është shumë herët të jepet një verdikt shkencor. E vetmja mënyrë që kjo të vërtetohet është pritja deri në verë dhe rezultatet e vërteta do të dalin nga studimi empirik i situatës.
Ndërkohë, nuk është veprim i mençur që t’i varim shpresat mbi këtë supozim dhe të mos përpiqemi që ta luftojmë koronavirusin, sepse nuk është e sigurtë se COVID-19 do të sillet sikur viruset e tjerë të familjes korona. /MeteoBallkan/
