Kjo verë po vazhdon me nxehtësi dhe deficit ekstrem të reshjeve atmosferike dhe gjatë kësaj jave priten rritje të temperaturave në tërë rajonin duke arritur përsëri shifrën 30 gradë Celsius dhe vende-vende duke e tejkaluar atë.
Edhe gjatë kësaj jave do të jemi nën ndikimin e masave të thata ajrore anticiklonike të cilat shërbejnë si bllokadë për depërtimin e reshjeve atmosferike. Temperaturat rriten në tërë rajonin si në Kosovë, Shqipëri, Maqedoninë Veriore, Kosovën lindore dhe Malin e Zi.
Pra, çdo ditë do të kemi rreze të shumta diellore dhe nxehtësi verore me depërtime të pakta të vranësirave kalimtare. Shumë rrallë në ndonjë rajon mund të ketë ndonjë rigë ose rrebesh afatshkurtër shiu me vetëtima dhe bubullimë. Temperaturat maksimale gjatë javës do të arrijnë deri në 30 gradë Celsius. Në shumë rajone ato pritet edhe të tejkalojnë shifrën 30 deri në 32 ose 33 gradë Celsius.
Nga e enjta ose e premta do të vazhdojë mot i nxehtë, por do të paraqiten mundësi që në viset tona kontinentale të ketë zhvillime të izoluara të ndonjë rrebeshi të shiut. Në bregdetin shqiptar mbetet mot i nxehtë me diell deri në fundjavë, ndërsa gjykuar sipas ecurive aktuale sinoptike në viset tona kontinentale so në Kosovë, Mal të Zi, pjesë të Maqedonisë së Veriut dhe Shqipërisë të shtunën pritet destabilizim i fuqishëm i motit.
Priten vranësira dhe rrebeshe shiu me vetëtima dhe bubullimë, veçanërisht në Kosovë dhe Mal të Zi, ndërsa nga e diela rrebeshet shtrihen edhe në Shqipëri dhe Maqedoninë Veriore. Këto janë të dhënat më të fundit sinoptike dhe sigurisht se në parashikimet afatgjata ndryshimet në nuanca janë më se të mundshme dhe nëse kemi ndryshime do të lajmëroheni me kohë në postimet tona të përditshme gjatë javës./Meteoballkan