Agjencia për Zhvillimin e Bujqësisë (AZhB) ka njoftuar se po vazhdon ekzekutimi i pagesave direkte për fermerët përfitues në kuadër të programit të subvencionimit.
Sipas njoftimit nga AZhB, vetëm gjatë ditës së sotme janë realizuar pagesa në vlerë prej mbi 2.8 milionë eurosh.
Pagesat e realizuara gjatë ditës përfshijnë tre kategori përfituesish, njofton AZhB.
Në sektorin e blegtorisë janë paguar 137 fermerë, me vlerë të përgjithshme prej 233 mijë e 525 eurosh. Për sipërfaqet bujqësore janë realizuar pagesa për 1 mijë e 123 fermerë, në vlerë prej 2 milionë e 299 mijë e 205.75 eurosh.
Ndërkaq, në kategorinë e bizneseve janë realizuar pagesa për 55 përfitues, në vlerë prej 348 mijë e 504.41 eurosh.
Agjencia ka bërë të ditur se ekzekutimi i pagesave do të vazhdojë edhe në ditët në vijim, deri në përfundimin e procesit për të gjithë fermerët që kanë aplikuar në kuadër të këtij programi.
Sipas AZhB-së, në këtë proces kanë aplikuar gjithsej 33 mijë e 460 fermerë.
Ndryshe, listat e përfituesve janë publikuar në uebfaqen zyrtare të Agjencisë për Zhvillimin e Bujqësisë.
