Një person ka humbur jetën dhe gjashtë të tjerë kanë mbetur të lënduar pas rënies së një vinçi në një kompleks apartamentesh në Dallas të Shteteve të Bashkuara të Amerikës. Vinçi u rrëzua për shkak të një stuhie që goditi Teksasin të dielën.
Të lënduarit janë dërguar menjëherë në spital, ndërsa dy prej tyre janë në gjendje kritike për jetën. Autoritetet janë shprehur se rrëzimi i vinçit ka shkaktuar edhe dëme të mëdha materiale si në katet e sipërme të kompleksit ashtu edhe në ato të poshtmet, përfshirë këtu edhe garazhet. Ndërkohë, në shumë zona në Teksas ka pasur ndërprerje të energjisë elektrike për shkak të stuhisë.
