Raportet për “dritat e tërmetit”, si ato që shihen në videot e kapura përpara tërmetit 6.8 ballë të së premtes në Marok, datojnë me shekuj që nga Greqia e lashtë.
Këto shpërthime të dritës së ndritshme i kanë habitur prej kohësh shkencëtarët dhe ende nuk ka konsensus se çfarë i shkakton ato, por ato janë “padyshim reale”.
Kështu tha John Derr, një gjeofizikan në pension i cili punonte në Shërbimin Gjeologjik të SHBA-ve.
Ai është bashkautor i disa punimeve shkencore mbi dritat e tërmetit, ose EQL.
“Të shohësh EQL varet nga errësira dhe faktorë të tjerë favorizues”, shpjegoi ai duke shtuar se videoja e fundit nga Maroku e shpërndarë në internet dukej si dritat e tërmetit të kapura në kamerat e sigurisë gjatë një tërmeti të vitit 2007 në Pisco, Peru.
Juan Antonio Lira Cacho, një profesor i fizikës në Universitetin Katolik Papnor të Perusë, i cili ka studiuar fenomenin, tha se videoja e telefonit celular dhe përdorimi i gjerë i kamerave të sigurisë e ka bërë më të lehtë studimin e dritave të tërmetit.
“Dyzet vjet më parë, ishte e pamundur”, tha ai.
“Nëse do t’i shihni, askush nuk do ta besonte atë që patë”.
Dritat e tërmetit mund të marrin disa forma të ndryshme.
Ndonjëherë, dritat mund të duken të ngjashme me vetëtimat e zakonshme, ose mund të jenë si një brez i ndritshëm në atmosferë i ngjashëm me aurorën polare.
Herë të tjera ato i ngjajnë sferave të ndezura që fluturojnë në ajër.
Ato gjithashtu mund të duken si flakë të vogla që dridhen ose zvarriten përgjatë ose afër tokës ose flakë më të mëdha që dalin nga toka.
Një video e marrë në Kinë pak para tërmetit të Sichuan të vitit 2008 tregon retë e ndritshme.
Studiuesit zbuluan se rreth 80% e dukurive të EQL të studiuara u vëzhguan për tërmete me magnitudë më të mëdhenj se 5.0.
Në shumicën e rasteve, fenomeni u vëzhgua pak para ose gjatë ngjarjes sizmike dhe ishte i dukshëm deri në 600 kilometra nga epiqendra e tërmetit./AP