Faqja prestigjioze evropiane për parashikim të motit “Severe Weather Europe” ka dal më një analizë mjaft të thukët dhe voluminoze për motin gjatë pjesës së parë të muajit Shkurt, me theks të veçantë për dhjetëditëshin e parë të Shkurtit për Kontinentin e Vjetër.
Fusha jashtëzakonisht të fuqishme anticiklonike kanë mbretëruar për një kohë të gjatë gjatë këtij dimri përgjatë rajoneve polare të Atlantikut verior duke krijuar një bllokadë anticiklonike dhe si konsekuencë, ngrohjen e menjëhershme të stratosferës dhe qarjen e rrethit polar. Pikërisht qarja e rrethit polar është menduar se do të na sjellë dimër të fortë edhe në rajonin tonë por jo domosdoshmërisht. Pikërisht këtu vjen dështimi i shumë meteorologëve (duke përfshirë edhe meteorologët e kësaj faqeje gjigande meteorologjike evropiane që kishin paralajmëruar një dimër sikur i vitit 1929) edhe profesional sepse e tëra varet nga pozitat e cikloneve dhe anticikloneve gjigande që qarkullojnë në atmosferë. Kjo pozitë sinoptike lejon ose bllokon ajrin polar të depërtojë në një rajon gjeografik. Sidoqoftë ajri i acart polar që ka qarkulluar për një kohë mjaft të gjatë në Euroazi më në fund do të fillojë të dislokohet në drejtim të Evropës veriperëndimore dhe perëndimore për shkak të pikërisht atyre anticikloneve gjigande polare- siberike dhe anticiklonit të fuqishëm skandinav.
Ajri i ftohtë polar do të përfshijë Britaninë e Madhe e pastaj edhe Francën, pjesë të Spanjës dhe Evropës qendrore, ndërsa a do të mund të arrijë edhe në Evropën juglindore në pjesën e dytë të Shkurtit është pikëpyetje.
Acar i madh pritet në Evropen veriore, Skandinavi dhe normalisht në Rusi.
Në anën tjetër në rajonin tonë gjatë kësaj periudhe do të depërtojnë masa ekstremisht të nxehta për këtë periudhë kohore. Fillimisht do të jetë thatë, ndërsa me fillimin e javës tjetër do të kemi rikthimin e shirave si pasojë e depërtimit të cikloneve të reja nga Atlantiku.
Vazhdon mot dinamik por i nxehtë për këtë periudhë kohore në rajonin tonë. Pas kësaj jave me rreze të shumta diellore pritet rikthimi i shirave, ndërsa reshjet e borës do të varen krejtësisht nga veprimet e “bishes së lindjes” në Evropën veriperëndimore dhe perëndimore. “Bisha e Lindjes” është term meteorologjik për ajrin ekstrem të ftohtë kontinetal që vije nga Euroazia në Evropë. Ky lloj i ajrit të ftohtë është i qëndrueshëm sepse ka origjinë kontinentale nga Siberia dhe Euroazia. Bisha e Lindjes gjatë pjesës së mbetur të dimrit mund të shtrihet edhe në drejtim të rajonit tonë nëse këtë e lejon gjendja sinoptike ose mund edhe të tërhiqet atje prej nga ka ardhur pa na prekur fare, megjithatë ky opsioni i dytë është më pak i besueshëm sepse kemi edhe gati dy muaj dimër./Meteoballkan
FOTO KRYESORE : SEVERE WEATHER EUROPE