Një front i fuqishëm i ftohtë ajror vjen në fillim të javës direkt nga veriu në drejtim të territoreve tona duke kushtëzuar shtim të vranësirave, reshje dhe rrebeshe lokale shiu me ndonjë vetëtimë dhe bubullimë, ulje të temperaturave dhe erëra nganjëherë të forta nga veriu.
Fonti do të jetë shumë më ndikues në Kosovë dhe disa viset tjera kontinentale të Shqipërisë dhe Maqedonisë së Veriut. Fronti nuk do të ndikojë shumë në bregdetin shqiptar, por megjithatë priten reshje dhe rrebeshe kalimtare edhe në disa zona bregdetare. Temperaturat do të shënojnë ulje të theksuara në viset kontinentale e ulje shumë më të lehta në viset mesdhetare e bregdetare.
Moti do të fillojë të ndryshojë natën mes së dieles dhe së hënës ose mëngjesin e hershëm të së hënës kur nga veriu do të kemi depërtimin e frontit të ftohtë përmes Republikës së Kosovës. Lokalisht priten zhvillime të rrebesheve lokale të shiut me vetëtima dhe bubullimë. Moti jo-stabil do të vazhdojë edhe gjatë ditës së hënë, me alternime mes vranësira, intervaleve kohore me diell dhe rrebesheve lokale të shiut me ndonjë vetëtimë dhe bubullimë. Temperaturat shënojnë ulje të ndjeshme gjatë ditës së hënë.
Fronti do të jetë kalimtar, ngase nga e marta do të kemi përmirësim gradual të motit. Edhe e marta do të jetë e freskët, me vranësira dhe ndonjë rrebesh lokal shiu, ndërsa nga e mërkura forcohet ndikimi anticiklonik, stabilizohet atmosfera dhe rriten përsëri temperaturat./METEOBALLKAN