Ende pa u larguar mirë vranësirat e dendura që sollën reshje të dendura atmosferike, një front i ri i ftohtë ajror pritet të përfshijë Republikës e Kosovës gjatë orëve të natës, eventualisht orëve të hershme të mëngjesit të së martës.
Pritet të ketë shtim dhe dendësim të vranësirave të cilat do të fillojnë të shoqërohen me reshje shiu. Në viset e larta malore reshjet do të jenë në formë sqote dhe bore.
Fronti i ftohtë do të jetë intensiv, por kalimtar. Fronti përpos Kosovës do të përfshijë edhe Malin e Zi dhe shumë pjesë të Shqipërisë, Maqedonisë së Veriut dhe Luginës së Preshevës. Në gati të gjitha viset pritet një valë e re reshjesh shiu, por nuk priten reshje që do të mund të shkaktonin probleme të mëdha sepse reshjet do të jenë kalimtare, edhe pse në disa momente dhe në disa rajone mund të jenë të dendura por nuk pritet të zgjasin shumë.
Reshje të dendura kalimtare shiu në mëngjesin e hershëm të së Martës priten në shumë pjesë të Kosovës, por intensitetit i reshjeve do të bjen me kalimin e frontit për të vazhduar reshje shiu të intensiteve mesatare dhe të dobëta.
Afërsisht diku në mesditë të ditës së Martë reshjet do të pushojnë dhe menjëherë do të pasojë kthjellimi i pjesshëm dhe priten intervale kohore me diell. Erërat veriore e veriperëndimore do të jenë të fuqishme në kohën e frontit në mëngjes herët dhe paradite, pastaj pasdite dhe në mbrëmje me stabilizim e atmosferës do të pasojë edhe dobësimi i erërave dhe stabilizimi i plotë i atmosferës.
Reshjet që ranë ditën e kaluar dhe këto që po vijnë do të ndikojnë jashtëzakonisht mirë në përmirësimmin e përgjithshëm të gjendjes me thatësinë , ndërsa po ashtu edhe stabilimi i plotë i motit që pritet pasditen dhe mbrëmjen e së martës dhe të mërkurën pritet të kemi mot kryesisht me diell dhe pa reshje atmosferike./MeteoBallkan
