Fronti i fuqishëm i ftohtë ajror kaloi dhe solli reshje shiu në tërë territorin e Republikës së Kosovës. Në fillim kishte erëra të fuqishme të cilat pastaj u dobësuan dhe dita vazhdoi me reshje shiu.
Dita e nesërme (e enjte) do të karakterizohet me mot kryesisht stabil dhe me të ngrohtë për këtë periudhë kohore, por normalisht mëngjesi mund të jetë i ftohtë dhe me mjegull. Reshje atmosferike nuk do të ketë.
Pasnesër ose të premten jemi para një ndryshimi edhe më të madh të motit për shkak të ardhjes së një cikloni të fortë i cili shumë shpejtë do të pozicionohet në Detin e Zi duke u fuqizuar. Cikloni vjen nga Evropa veriperëndimore, qendrore përmes Ballkanit në Detin e Zi dhe tutje më thellë në lindje të Evropes dhe Rusi.
Me afrimin e tij fuqizohen erërat jugore dhe jugperëndimore, ndërsa me kalimin e tij përtej territoreve tona në juglindje dhe lindje do të fillojnë të fryjnë erëra të forta dhe të ftohta nga veriu. Fillimisht priten reshje shiu dhe rrebeshe lokale me vetëtima dhe bubullimë (të premten pasdite). Pastaj, reshje bore në viset malore e më vonë edhe nëpër viset kodrinore-malore. Me ulje të mëtutjeshme të temperaturave dhe vazhdimin e erëra të ftohta nga veriu reshje bore mund të ketë edhe në disa ultësira të Republikës së Kosovës kryesisht në Rrafshin e Kosovës, por pa ndonjë akumulim signifikant. Akumulim të borës presim në viset malore dhe vende-vende edhe në zona kodrinore-malore.
Temperaturat shënojnë ulje dhe do të përjetojmë një ditë ose dy mjaft të ftohta me “aromë dimri”.
Reshje shiu priten edhe në Shqipëri dhe Maqedoninë e Veriut, kurse reshje bore vetëm në zonat malore të Shqipërisë, kurse në Maqedoninë Veriore edhe në zona paksa më të ulëta mbidetare, por jo në ultësira.
Për këtë “goditje arktike” do flasim prapë, ngase gjatë muajit Nëntor kaherë nuk kemi pasur një “goditje të tillë” edhe pse ende pa ndonjë reshje serioze bore, por vlen të përmenden erërat e forta dhe të ftohta nga veriu, bora sidomos në disa zona kodrinore-malore dhe malore. Ndryshime krejtësisht të vogla në parashikim ende mund të ketë, por një gjë duhet theksuar se nga e diela, eventualisht më së largu nga e hëna temperaturat rriten përsëri./MeteoBallkan
