Sistemi frontal i cili mëngjesin e hershëm sot përshkoi rajonin tonë solli reshje të dendura shiu dhe rrebeshe në shumë pjesë të rajonit tonë si dhe erëra të fuqishme kalimtare. Në viset e larta malore pati reshje bore. Temperaturat ishin të larta që reshjet borës të paraqiten në lartësi më të ulëta mbidetare.
Sidoqoftë, sonte gjatë natës do të kemi edhe një front të ftohtë ajror i cili prapë do të na sjellë reshje kalimtare shiu dhe bore. Kësaj radhe me uljen e temperaturave reshjet e borës mund të paraqiten edhe në disa ultësira të Republikës së Kosovës. Erërat do të ndryshojnë drejtim dhe do të fillojnë të fryjnë nga veriu dhe veriperëndimi. Pra, kemi të bejmë me një front tipik kalimtar i cili do të shkaktojë ulje afatshkurtra të temperatuave.
Nesër na pret mot pak i ftohtë dhe me erëra veriore. Gjatë natës dhe meëngjesin e së premtës do të ketë ngrica, kurse gjatë ditës së premte ngritje të temperaturave dhe kjo do të jetë hyrje në ngritjen e ndjeshme të temperaturave që priten në fillim të Shkurtit si pasojë e depërtimit të një mase të nxehtë ajrore nga Mesdheu dhe Afrika Veriore.
Kjo masë e nxehtë ajrore do të zgjasë afërsisht deri me 5 ose 6 Shkurt kur do të kemi përkeqësim të motit, ulje të temperaturave dhe mundësi për reshje bore. Kjo datë është ende larg dhe për këtë arsye duhet pritur edhe pak për konkluzione të sakta, por gjasat janë mjaft të mira që ti përjetojmë edhe ne reshjet e dendura të borës./Meteoballkan
