Edhe sot jemi nën ndikimin e ciklonit që po shtrihet nga Deti Jon deri në Detin Egje në Greqi, por ky ciklon po sjellë reshje bore në Bullgari, Rumani, Serbi e Bosnjë dhe Hercegovinë. Reshjet janë të dendura vetëm në pjesë të Rumanisë dhe Bullgarisë.
Cikloni po vjen duke u dobësuar dhe larguar, ndërsa do të vazhdojë të sjellë reshje sporadike bore në disa vise të Republikës së Kosovës sonte dhe nesër si dhe temperatura krejtësisht normale dimërore.
Në anën tjetër kemi fuqizim të anticiklonit të Azoreve i cili nga Britania dhe Franca do të zgjeroher drejt rajonit tonë duke larguar përfundimisht reshjet atmosferike edhe ashtu të pakta.
Fundi i Janarit (dita e fundit) do të na sjellë një front të ri të ftohtë ajror dhe reshje kalimtare, lokale bore.
Edhe fillimi i Shkurtit na premton mot mjaft dinamik dhe vazhdimin e temperaturave dimërore. Fillimisht do të ketë një rritje afatshkurtër të temperaturave pastaj ulje të ndjeshme të tyre me ardhjen e një fronti tjetër të ftohtë.
Një front i fuqishëm i ftohtë ajror pritet të arrijë ditën e dytë të Shkurtit duke sjellur reshje të reja që fillimisht mund të jenë shi e pastaj borë. Ky front ka gjasa që të mundësojë depërtimin e masave të fuqishme të ftohta ajrore që vijnë nga Rusia, prandaj mund të kemi ndonjë ditë mjaft të ftohtë në këtë fillim të Shkurtit ku priten edhe reshje të herëpashershme bore./MeteoBallkan
