Evropa është e ndarë në dysh në këto çaste ku kemi aktivitete të fuqishme ciklonike që nga veriu i Portugalisë, Franca, Gjermania, Britania e Madhe, Skandinavia dhe Rusia. Në këto rajone po depërtojnë masa ajrore mjaft jostabile ajrore me origjinë nga Oqeani Atlantik dhe si pasojë ka reshje të dendura shiu e bore varësisht nga temperaturat. Në pjesën më të madhe ka reshje shiu, ndërsa reshje bore ka në Skoci të Britanisë së Madhe, Skandinavi dhe Rusi. Stuhi të furishme bore priten në rajonin e Rusisë këto ditë.
Në anën tjetër që nga jugu i Portugalisë, Mesdheu perëndimor e qendror e lindor, Italia, Ballkani dhe Turqia deri në Euroazi kemi masa të fuqishme stabile anticiklonike dhe po mbretërojnë temperatura pothuajse pranverore.
Diku rreth pjesëve qendrore të Evropes kemi frontet ajrore që janë vija ndarëse mes masave të fuqishme ciklonike dhe anticiklonike, ndërsa bllokada e fuqishme anticiklonike nuk do të lejojë ardhjen e këtyre fronteve drejt rajonit tonë.
Gjendje e ngjashme sinoptike do të vazhdojë të paktën edhe javën e parë të Janarit deri kur rajoni ynë do të jetë me mot krejtësisht stabil dhe pa reshje atmosferike, ndërsa ka disa shenja që nga 7 Janari mund të kemi ndryshim gradual të gjendjes sinoptike dhe depërtimin e ndonjë fronti të ftohtë që do të mund të krijonte ndonjë ciklon dhe eventualisht të na sillte reshje shiu e bore, por kjo është vetëm një sinjal i largët dhe ende i paqëndrueshëm./MeteoBallkan
