Cikloni i stacionuar në Detin Egje po vazhdon ndikimin e tij duke sjellur vranësira dhe reshje të herëpashershme, lokale bore .Kthjellime ka në viset bregdetare të Shqipërisë dhe sidomos në Ultësirën Perëndimore. Reshje bore ka në shumë zona të Kosovës sidomos në viset kodrinore-malore, por edhe në disa vise tjera. Reshjet do të vazhdojnë edhe sonte dhe gjatë ditës së Enjte. Reshjet e borës nuk do të jenë të pandërprera, por me episode apo të herëpashershme dhe të karakterit lokal.
Bora do të vazhdojë në shumë pjesë të Kosovës dhe Maqedonisë së Veriut, pastaj në veri dhe lindje të Shqipërisë, (më rrallë dhe vetëm lokalisht), Luginë të Preshevës dhe veri të Malit të Zi. Në viset tjera do të jetë kryesisht thatë, ndërsa do të shpeshtohen intervale kohore me diell.
Anticikloni masiv në Kontinentin Evropian do të fillojë të zgjerohet në drejtim të Ballkanit, por ndikimi ciklonik mbetet ende aktiv deri në fundjavë dhe ky kombinim do të mundësojë ardhjen e mëtutjeshme të ajrit të ftohtë nga lindja e Kontinentit, nga jugu i Rusisë dhe Deti i Zi me erëra veriore dhe verilindore.
Të Premten reshjet pushojnë, por pastaj do të kemi edhe një valë kalimtare (të karakterit lokal) reshjesh bore kryesisht në disa vise të Kosovës dhe viset malore të rajonit dhe po ashtu depërtim edhe më të fortë të ajrit të ftohtë, por asgjë ekstreme. Pasi që pritet kthjellim i motit për fundjavë mund të kemi fuqizimin e acarit të mëngjesit.
Nga e shtuna reshjet pushojnë plotësisht dhe në çdo rajon, por mbetet acari i fortë në mëngjes, kurse nga e diela parashihet të ketë rritje graduale të temperaturave.
Pra, sipas ecurive aktuale sinoptike nga e diela dhe fillimi i javës së re do të kemi ardhjen e një mase ajrore pak më të ngrohtë nga Mesdheu dhe temperaturat do të rriten si dhe acari do të zbutet./MeteoBallkan
