Në Britaninë e Madhe për momentin kemi një fushë ajrore masive me presion të lartë atmosferike (anticiklon), ndërsa në Rusi kemi një fushë masive ajrore me presion të ulët atmosferike (ciklon).
Rajoni ynë gjendet mes këtyre dy masave gjigande ajrore, por më i theksuar është ndikimi anticiklonik nga Britani dhe për këtë arsye kemi reshje të rralla dhe vetëm në disa rajone. Një tjetër ciklon mjaft i fuqishëm gjendet në Detin Egje dhe ky ciklon po kushtëzon reshje të dendura bore në Turqi. Turqia pritet të përfitojë reshje intensive dhe shumëpërfshirëse bore këto ditë.
Gjatë ditëve të ardhshme “anticikloni britanik” pritet të shtrihet në drejtim të rajonit tonë, ndërsa cikloni i fuqishëm rus pritet të zgjerohet në gati tërë Rusinë dhe pastaj në Azi duke shkaktuar edhe atje reshje intensive dhe masive bore. Këto kombinime të këtyre faktorëve atmosferik pritet të shkaktojnë ulje të temperaturave edhe tek ne sidomos të martën dhe të mërkurën, por reshje do të jenë krejtësisht të karakterit lokal dhe sporadike për shkak se cikloni gjendet shumë larg territoreve tona dhe situatën do ta mer në kontroll “anticikloni britanik”.
Kjo gjendje sinoptike do të ndryshojë nga dita e enjte kur ky anticiklon pritet të rrugëtojë drejt Turqisë, ndërsa ciklone të reja masive nga Atlantiku pritet të shtrijnë nfikimin e tyre drejt Mesdheut veriperëndimor dhe Italisë duke kushtëzuar erëra jugore në Gadishullin Ballkanik dhe në këtë mënyrë edhe rritje të temperaturave. Njëkohësisht priten edhe reshje të reja shiu të cilat të cilat në Shqipëri përsëri mund të jenë mjaft intensive duke rrezikuar rajonet të cilat vuajtën nga vërshimet këtyre ditëve nga prurjet e mëdha të disa lumenjve për shkak të reshjeve të dendura të ditëve të kaluara. Sidoqoftë këto reshje pritet të vijnë afërsisht kah fundi i javës së re dhe deri atëherë lumenjt pritet të stabilizohen.
Rritja e temperaturave e cila pritet gjatë fundit të javës së re sipas të gjitha gjasave nuk pritet të zgjasë shumë, (rreth 5 ose 6 ditë) por për këtë flasim në postimet tjera./MeteoBallkan