Ajri i ftohtë polar ka pushtuar viset tona dhe kjo është gjë e mirë në këtë periudhë kohore, por shqetëson mungesa e borës ashtu si shumë vitet e kaluara, mungesa e borës po bëhet një fenomen dhe një trend gjithnjë e më shqetësues.
Reshje bore pati në shumë vise të Republikës së Kosovës, por sasia e reshjeve ishte shumë e vogël me përjashtim të viseve kodrinore-malore ku pati më shumë, ndërsa bora e rënë ka mbetur ende për shkak të temperaturave më në fund normale për këtë periudhë kohore.
Kualiteti i ajrit u përmirësua dukshëm me ardhjen e ajrit të ftohtë polar të shoqëruar me erërat e ftohta veriore e verilindore, por ardhja pastaj e mases ajrore stabile anticiklonike ka stabilizuar atmosferën tani dhe ka dobësuar erërat dhe me këtë mund të kemi përkeqësim të sërishëm të kualitetit të ajrit në Kosovë dhe rajon.
Temperaturat do të fillojnë të rriten nesër (e Enjte) pas një mëngjesi me acar të fortë polar, por plotësisht normal, ndërsa të premten do të kemi një fluks tjetër të ajrit të ftohtë polar dhe me këtë përmirësohen sërish kualiteti i ajrit.
Një masë e fuqishme e ftohtë e acarit polar do të kalojë thellë në lindje të Kontinentit dhe në territoret tona arrin periferia e kësaj mase shumë të ftohtë ajrore. Si pasojë vranësira shtohen dhe do të ketë reshje sporadike bore. Fronti nuk do të jetë i pasur me lagësishti, prandaj reshjet e borës do të jenë të pakta dhe të karakterit lokal.
Erërat veriore dhe verilindore fuqizohen sërish të premten dhe temperaturat ulen dukshëm. E diela sjellë zbutje të acarit polar dhe rritje të temperaturave.
Në fillim të javës së re, gjegjësisht të martën mund të kemi një front dhe ciklon kalimtar që eventualisht do të sjellë reshje kalimtare bore në shumë vise të territoreve tona. Ky front parashihet të jetë më i pasur me lagështi, por deri të fillim të javës së re kemi shumë ditë dhe ndryshime priten.
Gjysma parë e këtij dimri po vazhdon të kalojë me mungesë të theksuar të borës dhe kjo mund të ndryshojë vetëm në gjysmën e dytë të dimrit dhe këtë do shohim gjatë periudhës së ardhshme, por që vjen koha dhe kemi një mungesë kaq të madhe të reshjeve të borës në përgjithësi në Ballkan dhe në territoret tona këtë pak kush e ka imagjinuar.
Natyra gjithsesi tenton të kthejë baraspeshën e gjërave, por kur do të ndodhë kjo mbetet vetëm të përcillet./MeteoBallkan
