Siç kemi paralajmëruar edhe në shumë postime tjera dhe siç po shihet edhe në imazhin lartë shumica e Kontinentit evropian gjendet nën ndikimin e masave të fuqishme anticiklonike të cilat vijnë nga Oqeani Atlantik gjegjësisht i ashtuquajturi Anticikloni i Azoreve i cili shpeshherë është edhe “fajtori” kryesor për mungesën e reshjeve të dëbores në Evropë por edhe tek ne.
Ky anticiklon është shtrire me disa qendra në tërë Evropën kontinentale dhe gjithashtu edhe tek ne, me përjashtim të Evropës Veriore dhe në afërsi të Turqisë dhe Greqisë. Anticikloni do të ketë rol të madh gjatë ditëve të ardhshme dhe pikërisht ky anticiklon do të jetë përgjegjës për mungesën e një cikloni në Adriatik gjatë vikendit i cili do të na sillte reshje intensive bore. Anticikloni i fuqishëm do ti “dëbojë” masat ajrore ciklonike më në juglindje gjegjësisht në drejtim të Greqisë dhe Turqisë dhe për këtë arsye edhe kësaj radhe do të mbetemi pa sasi të mëdha të reshjeve të dëborës, megjithatë gjatë ditës së diel priten reshje lokale bore në disa pjesë të Kosovës, Shqipërisë verilindore, lindore, juglindore dhe disa pjesë të qendrës si dhe reshje bore priten edhe veriun e Malit të Zi dhe shumë pjesë të Maqedonisë së Veriut. Reshje të fuqishme bore priten në Greqi dhe Turqi.
Pra për ta thjeshtuar pak: deri të dielën na pret mot stabil dhe relativisht i nxehtë me mundësi për krijimin e mjegullnajave nga nata e sontme. Mëngjeset dhe netët do të jenë me ngrica, kurse dita më e nxehtë nëse nuk do të ketë mjegull.
Të dielën pritet të kemi reshje lokale bore, erëra të ftohta veriore dhe ulje të theksuara të temperaturave. Reshjet do të jenë pothuajse të ngjashme sikur herën e kaluar.
Për reshje më intensive bore do të duhet të presim ende dhe të shpresojmë./Meteoballkan
