Sot temperaturat kanë shënuar ulje në territoret tona për shkak të ndikimit të vazhdueshëm të ciklonit të shtresave të larta të atmosferës, ndërsa zhvillime të fuqishme me shtrëngata intensive ka në Greqi ku gjendet edhe qendra e ciklonit.
Cikloni i pozicionuar në Detin Egje dhe Greqi ka tërhequr temperaturat pak më të ulëta nga veriu i Kontinentit.
Në këto çaste zhvillime të stuhive të izoluara ka në jug- juglindje të Shqipërisë dhe disa vise në Maqedoninë Veriore.
Gjatë orëve të vonshme të pasdites dhe mbrëmjes priten zhvillime të fuqishme të stuhive lokale në shumë vise të Shqipërisë e sidomos në Maqedoninë Veriore për shkak të afërsisë gjeografike me qendren e ciklonit në Greqi. Disa zhvillime priten edhe në Kosovë, sidomos në juglindje të vendit, por duke pasur para sysh se zhvillimet e stuhive verore nganjëherë janë të paparashikueshme mund të kemi edhe në Kosovë zhvillime të fuqishme edhe pse modelet nuk po shohin zhvillime në Kosovë në përditësimet e tyre më të fundit.
Sidoqoftë, gjatë orëve të mbrëmjes në territorin e Maqedonisë së Veriut priten rrebeshe intensive shiu me vetëtima dhe bubullimë, lokalisht edhe në disa vise të Shqipërisë, ndërsa në Kosovë gjasat për rrebeshe të fuqishme më të përhapura janë rreth 50% tani për tani./MeteoBallkan
