Gjatë javës së re na pret mot i ndryshueshëm dhe dinamik për shkak të lëvizjeve dinamike në atmosferë.
Një seri ciklonesh nga Evropa veriore do të shtrihen drejt Evropes lindore dhe me frontet e tyre të dobësuara do të ndikojnë në motin edhe në viset tona duke sjellur reshje kalimtare, lokale kryesisht bore.
Ajo çfarë dëshirojmë të fokusohemi më këtë postim është cikloni i mesjavës ose fundit të javës i cili nga Evropa veriore do të shtrihet në Evropen lindore, ku pastaj diku në Turqi priten të krijohet një ciklon sekondar shumë i fuqishëm i cili potencialisht do të shkaktojë stuhi të fuqishme bore në Turqi dhe Egjeun grek.
Në anën tjetër në Evropen perëndimore dhe veriperëndimore do të kemi zhvillimin e një mase të fuqishme anticiklonike. Ne do të jemi mu në mes të këtyre dy masa gjigande atmosferike.
Si pasojë e kësaj gjendjeje sinoptike në rajonin tonë do të mbizotërojnë rrymime të fuqishme ajrore nga veriu dhe do të kemi depërtimin e një mase mjaft të ftohtë ajrore nga verilindja e Evropës, Rusia dhe Siberia drejt rajonit tonë.
Sa iu përket reshjeve të borës është joserioze të debatohet nga tani, ngase e tëra do të varet nga pozicionimi i ciklonit “turko-grek”. Nëse cikloni “zhvendoset” vetëm pak drejt perëndimit atëherë na presin reshje të dendura bore, por nëse anticikloni i fuqishëm evropian “shtyn” ciklonin më në lindje atëherë na presin reshje të pakta bore, por ajo çfarë është e sigurtë tërësisht nga tani janë erërat e ftohta veriore dhe ulja e ndjeshme e temperatruave, edhe pse nuk pritet ndonjë i ftohtë tepër ekstrem.
Pra, gjatë javës së re na pret mot i ndryshueshëm, por gjysma e parë e javës nuk do të jetë aq e ftohtë. Priten reshje të herëpashershme lokale kryesisht bore, ndërsa afër fundjavës do të kemi situatën sinoptike që e përshkruam më lartë./MeteoBallkan
