Rruga Kukës-Shishtavec është kthyer në një kërcënim serioz për udhëtarët dhe drejtuesit e mjeteve. Jo vetëm dhera e inerte, por shkëmbinj të përmasave të mëdha shkëputen nga faqet e malit e bien në rrugë në këto kohë shirash në verilindje.
E mbetur pa mirëmbajtje, për shkak të përfundimit të kontratës së segmentit të parë, por edhe moskalimit në vartësi të Autoritetit Rrugor Shqiptar të segmentit të dytë, kjo rrugë mbetet në mëshirë të fatit. Bashkia ka angazhuar mjetet e saj për pastrimin e rrugës deri vonë pas mesnate e për ta rikthyer në normalitet, por problemi mbetet i pazgjidhur pa sipërmarrje.
Reshjet e shiut nuk shkaktuan probleme vetëm në këtë aks rrugor, por edhe në disa akse të tjera rurale në fshatrat e thella. Pa energji elektrike mbetën fshatrat e njësive administrative Shishtavec, Bushtricë, Ujmisht e Grykëçajë, për të cilat grupet e punës të OSHEE janë në terren e po punojnë për rikthimin e energjisë./A2CNN
