Korporata Energjetike e Kosovës (KEK) dhe Operatori i Sistemit, Transmetimit dhe Tregut (KOSTT) kanë nënshkruar sot, më 29.05.2025, një marrëveshje bashkëpunimi për furnizim me energji elektrike.
Sipas komunikatës së KEK-ut, kjo marrëveshje vjen në kuadër të procesit të liberalizimit të tregut të energjisë në Kosovë dhe konsiderohet me rëndësi të veçantë për shkak të rolit strategjik që luan në këtë tranzicion.
“Marrëveshja përfaqëson një moment kyç në zhvillimin e sektorit energjetik në vend” – thuhet në komunikatë, në të cilën theksohet se ajo krijon bazat për një furnizim të sigurt, efikas dhe transparent me energji elektrike.
Përfaqësuesit e KEK-ut dhe KOSTT-it e kanë vlerësuar rëndësinë strategjike të këtij bashkëpunimi dhe janë zotuar për vazhdimin e tij edhe në të ardhmen.
“KEK dhe KOSTT janë të përkushtuar që bashkëpunimi i ndërsjellë të vazhdojë dhe të zgjerohet edhe në fusha të tjera me interes të përbashkët, gjithmonë në funksion të përmirësimit të qëndrueshmërisë dhe efikasitetit të sektorit energjetik në vend” – thuhet më tej në njoftim.
Ky zhvillim vjen në një ditë kur në Prishtinë bizneset i bllokuan për dy orë hyrjet në kryeqytet si shenjë proteste ndaj vendimit të Zyrës së Rregullatorit të Energjisë së Elektrike (ZRRE). Nga 1 qershori, sipas këtij vendimi, bizneset e mëdha do të dalin në treg të hapur për energji elektrike, çka ka ngjallur shqetësime dhe reagime nga ana e tyre.
