Kompania Rajonale e Ujësjellësit “Prishtina” ka njoftuar se Impianti i Trajtimit të Ujit në Shkabaj është tashmë jashtë funksionit për shkak të nivelit shumë të lartë të turbullirave në kanalin e “Ibër -Lepencit” për shkak të reshjeve të dendura atmosferike, çka e bën të pamundur procesin e trajtimit të ujit.
Sipas njoftimit, pa furnizim me ujë do të mbesin: Fushë-Kosova, Drenasi, Obiliqi e një pjesë e lagjes “Kalabria” në Prishtinë.
“Gjithashtu, ndikime dhe reduktime të furnizimit priten edhe në disa zona të kryeqytetit. Ekipet tona janë në terren dhe po monitorojnë situatën vazhdimisht. Furnizimi do të rikthehet menjëherë sapo të stabilizohen parametrat në kanalin furnizues”- thuhet në komunikatë.
