Tetë lloje tarifash për secilin sezon shpenzues, e bëjnë të vështirë planifikimin e shpenzimit të energjisë elektrike prej konsumatorëve, të cilët ankohen për fatura të fryra.
Zyra e Rregullatorit për Energji Elektrike, thonë se nuk ka pasur kërkesë për rritje të çmimit të rrymës, por çmimi është më i lartë gjatë sezonit të dimrit.
Nga KEDS-i në të kaluarën janë pajtuar se tarifat janë të komplikuara dhe janë shprehur pro reformimit të tyre. Sipas ZRRE-së, tarifat për energjinë elektrike ndahen në dy sezone. Sezonin dimëror dhe atë veror.
Sezoni dimëror fillon nga 1 tetori deri më 31 mars, kurse sezoni veror fillon prej 1 prillit deri më 30 shtator. Për sezonin dimëror, tarifa e lartë A1 aplikohet prej orës 07:00 – 22:00, kurse tarifa e ulët A2 prej 22:00 – 07:00.
Ndërsa, për sezonin veror tarifa e lartë aplikohet nga ora 08:00 – 23:00, kurse tarifa e ulët prej orës 23:00 – 08:00. Tarifat e rrymës, po ashtu, janë të ndara edhe në disa nëntarifa të tjera, në bazë të sasisë së shpenzuar brenda një muaji.
Struktura e tarifave me pakicë të energjisë elektrike për konsumatorët e rregulluar e zbatueshme është nga 1 prilli 2015. Grupi tarifor në amvisëri ka këto tarifa;
Për 200 kilovatët e parë tarifa mban shifrën B1, për të cilën konsumatori do të paguajë gjatë tarifës së lartë (07:00 – 22:00) 5.55 centë dhe kjo tarifë shifrohet me A1B1 (A1 për tarifën e lartë prej orës 7 deri në 22, ndërsa B1 për tarifën prej 0 deri në 200 kilovat në muaj) , ndërsa gjatë tarifës së ulët çmimi është 2.79 centë dhe shifrohet me A2B1.
Gjatë verës A1B1 kushton 3.99 centë për kilovat në orë, ndërsa A2B1 kushton 1.99 centë.
Kilovatët mbi 200 deri në 600, tarifë kjo e emëruar B2, gjatë sezonit të dimrit do të paguhen gjatë tarifës së lartë (A1B2) 7.70 centë, ndërsa gjatë tarifës së ulët (A2B2) 3.86 centë për kilovat në orë.
Gjatë verës A1B2 kushton 5.51 centë për kilovat në orë, ndërsa A2B2 kushton 2.76 centë.
Tarifa mbi 600 kilovatë emërohet me B3, ndërsa paguhet gjatë tarifës së lartë (A1B3) me 11.17 centë, ndërsa gjatë kohës së tarifës së ulët (A2B3) kushton 5.58 centë.
Gjatë sezonës së verës A1B3 kushton 8.00 centë, ndërsa A2B3 4.01 centë. Përveç kësaj, secilës faturë në fund i shtohen 2.27 euro pagesë fikse mujore si dhe 18 për qind TVSh. /Zeri
