Masa mjaft të nxehta ajrore kanë depërtuar në rajonin tonë këtë javë duke kushtëzuar mot mjaft të nxehtë dhe stabil. Temperaturat kanë shënuar ngritje të theksuar veçanërisht sot dhe pritet të shënojnë ngritje të mëtutjeshme nesër.
Në nivel rajoni temperaturat maksimale pritet të arrijnë deri në 40 gradë Celsius si psh. në Podgoricë të Malit të Zi dhe Mostar të Bosnjës vende këto që konsiderohen si më të nxehtat në rajon duke mos përjashtuar edhe disa vende në Shqipëri, por në përgjithësi në Kosovë dhe Shqipëri temperatura maksimale pritet të arrijë rreth 37- 38-39 gradë Celsius kryesisht në rajonin e Dukagjinit dhe viset mesdhetare të Shqipërisë.
Masat ajrore të thata anticiklonike po ashtu do të na sigurojnë mot të kthjellët, megjithatë ditën e premte pasdite në shumë vise në Kosovë do të kemi depërtimin e një fronti të dobët të ftohtë ajror i cili do të shkaktojë destabilizim të pjesshëm të atmosferës. Të premten përpos nxehtësisë së madhe të paradites, pasdite do të kemi gjasa të shohim edhe zhvillime të fuqishme të vranësirash të cilat do të na freskojnë dhe njëkohësisht mund të kushtëzojnë rrebeshe lokalisht të fuqishme shiu me vetëtima, bubullimë dhe mundësi edhe për breshër. Kjo vlen vetëm për Kosovë (jo tërë territorin), Mal të Zi dhe rrallë ndonjë rajon të Shqipërisë dhe Maqedonisë së Veriut. Të shtunën rrebeshet e shiut do të mund të paraqiten edhe në disa pjesë të Maqedonisë së Veriut dhe Shqipërisë, veçanërisht në juglindje, lindje dhe disa pjesë në qendër të Shqipërisë. Po ashtu priten ulje të lehta të temperaturave dhe freskim i lehtë i motit, ndërsa në zonën e rrebesheve të shiut freskimi i motit do të jetë shumë më i theksuar./Meteoballkan
