Ditët e fundit të Gushtit dhe fillimi i Shtatorit do të karakterizohet me mot jo shumë të ndryshueshëm, me ditë të mira dhe të këndshme, por edhe me përkeqësime afatshkurtra të motit sidomos në viset kontinentale.
Sot siç po shihet pritet mot me intervale të gjata kohore me diell dhe vranësira të pakta kalimtare. Shumë rrallë në ndonjë rajon mund të ketë ndonjë rigë afatshkurtër shiu, ndërsa në bregdet mot me diell dhe i ngrohtë.
Nesër (e martë) pritet mot kryesisht me diell dhe më i ngrohtë në tërë rajonin ku në bregdet temperatura mund të prekë 30 gradë Celsius, ndërsa në Kosovë rreth 28 gradë Celsius temperatura maksimale.
Të mërkurën në Kosovë dhe disa vise të Shqipërisë, Malit të Zi dhe Maqedonisë do të depërtojë një fronti i ftohtë ajror i cili do të ndjehet më së shumti në Kosovë. Priten reshje shiu dhe mundësi edhe për rrebeshe lokale me vetëtima dhe bubullimë. Po ashtu priten edhe ulje të temperaturave, ndërsa në bregdet fronti nuk do të ndjehet shumë. Priten vranësira kalimtare dhe erëra si dhe ulje të lehta të temperaturave. Në përgjithësi në bregdet mbetet mot kryesisht me diell.
Nga e enjta përmirësim i motit edhe në viset kontinentale dhe pas uljeve të temperatruave do të fillojë rikoperimi gradual i tyre, ndërsa në bregdet vazhdon mot i këndshëm për pushime. Të premten dhe të shtunën na pret mot kryesisht me diell në tërë rajonin dhe i ngrohtë.
Sipas ecurive aktuale sinoptike të shtunën në bregdetin shqiptar do të ketë shtim gradual të vranësirave, ndërsa pasdite vonë ose në mbrëmje vende-vende do të fillojnë rrebeshe lokale shiu me shkarkesa atmosferike. Gjatë natës dhe ditën e diel priten rrebeshe shiu me vetëtima dhe bubullimë në shumë vise të Shqipërisë, ndërsa reshjet e shiut do të përhapen edhe në Kosovë, Maqedoninë Veriore dhe Luginën e Preshevës gjatë së dieles.
Në përgjithësi gjatë kësaj jave na pret mot i këndshëm, me përjashtim të ditës së mërkurë në Kosovë kur priten reshje shiu dhe ulje të temperaturave si dhe për fundjavë ku në Shqipëri priten rrebeshe shiu, por për fundjavë duhet të theksojmë se periudha kohore është e gjatë dhe ndryshimet në parashikim mund të ndodhin.
Parashikimet afatgjata i komplikon jashtëzakonisht shumë gjendja shumë aktive me uragane në Amerikë ngase këto sisteme të fuqishme tropike nga Amerika do të zhvendosen në Oqeanin Atlantik dhe nga Atlantiku në Evropë dhe kjo komplikon parashikimet për kontientin Evropian duke destabilizuar barazpeshën e ecurive normale të qarkullimit të masave ajrore në Atlantik.
Për çdo ndryshim eventual do ju njoftojmë në postimet tona të përditshme./Meteoballkan
