Java ka filluar plotësisht stabile dhe me diell, ndërsa temperaturat janë rreth vlerave mesatare pas nxehtësisë së ditëve të kaluara dhe rrebesheve të shiut ditën e Shtunë.
E Hëna kaloi me mot krejtësisht stabil, kurse të Martën temperaturat do të jenë verore mbi 30 Gradë Celsius në shumë zona sidomos në ato zona ku tradicionalisht është më nxehtë.
Njëkohësisht një front i fuqishëm i ftohtë ajror po depërton në veriperëndim të Ballkanit dhe veri të Adriatikut.
Ky front i fuqishëm i ftohtë ajror do të sjellë stuhi të fuqishme shiu në veri të Adriatikut në pjesë të Sllovenisë, Italisë, pastaj edhe në pjesë të Kroacisë dhe natyrisht të Mërkurën pritet destabilizim i fuqishëm i atmosferës edhe në Shqipëri, Kosovë, Maqedoninë Veriore, Mal të Zi dhe Luginë të Preshevës.
Ardhja e masës ajrore jo-stabile
Dita e Mërkurës do të nis e nxehtë, me diell dhe vranësira lokale. Gjatë dites pritet të ketë shtim dhe grumbullim të vranësirave të cilat vende-vende do të dendësohen duke krijuar kushte për rrebeshe lokale shiu me vetëtima, bubullimë dhe në disa vise pritet të ketë edhe breshër. Vende-vende priten rrebeshe intensive shiu me vetëtima dhe bubullimë, ndërsa temperaturat ulen gjatë dhe pas reshjeve.
Atmosfera do të destabilizohet në të gjitha viset që nga Shqipëria, pastaj në Kosovë, perëndim të Maqedonisë së Veriut dhe lokalisht edhe në shumë vise tjera. Reshjet do të jenë të karakterit lokal, por mund të kapin shumë rajone.
Edhe dita e Enjte pritet të jetë jo e qëndrueshme, me intervale kohore me diell dhe vranësira të cilat nganjëherë, vende-vende pritet të krijojnë kushte për rrebeshe lokale shiu me vetëtima dhe bubullimë.
Stabilizimi i atmosferës
Nga e Premtja masat jo-stabile dobësohen dhe largohen nga viset tona dhe kemi depërtim të masave më stabile anticiklonike, prandaj pritet përmirësim i motit edhe pse përpos diellit do të kemi vranësira lokale dhe rrallë në ndonjë zonë ndonjë reshje të izoluar.
Fundjava vjen më e qetë, me diell dhe vranësira të herëpashershme. Temperaturat do të rriten përsëri. Reshje atmosferike në përgjithësi nuk priten, por mund të ketë vetëm në disa vise ndonjë reshje e dobët e izoluar. Megjithatë, të dielën pasdite mund të ketë ndonjë zhvillim të ndonjë rrebeshi lokal të shiut me ndonjë vetëtimë dhe bubullimë.
Ishte ky parashikimi i motit për javën e parë të Shtatorit ku presim të gjitha ngapak që nga dielli dhe vapa e deri te rrebeshet dhe stuhitë lokale të shiut me vetëtima dhe bubullimë.
Ndryshime të vogla në parashikim gjithsesi se mund të ketë dhe për çdo ndryshim eventual do të njoftoheni në postimet tona të përditshme në MeteoBallkan./MeteoBallkan
