Mot më i ndryshueshëm na pret gjatë kësaj jave në Kosovë dhe rajon ku priten edhe vranësira të shpeshta. Ditët e para të javës do të kemi rritje të ndjeshme të temperaturave si pasojë e rrymimeve të fuqishme ajrore nga jugu dhe jugperëndimi.
Nën ndikimin e masave ajrore anticiklonike dhe masave të presionit të ulët që tentojnë të depërtojnë nga Atlantiku përmes Mesdheut temperaturat do të rriten ndjeshëm, ndërsa priten edhe riga të herëpashershme shiu sidomos në shumë zona të Shqipërisë. Fillimisht riga lokale shiu priten në Mal të Zi dhe ekstremin jugor dhe verior të Shqipërisë. Ndonjë rigë shiu mund të ndodhë edhe në Kosovë sidomos në Dukagjin.
Në Mesjavë në Shqipëri priten zhvillime të rrebesheve lokale të shiut me vetëtima dhe bubullimë, ndërkohë që vazhdojnë rrymimet mjaft të ngrohta ajrore me jugu dhe jugperëndimi. Në viset tjera priten vranësira e intervale kohore me diell dhe aty-këtu ndonjë rigë shiu. Temperaturat shënojnë rritje të ndjeshme deri në 15 apo ndoshta edhe 16 gradë Celsius në Kosovë.
Ndryshimi drastik i motit
Të Premten sipas ecurive aktuale sinoptike do të kemi ardhjen e një fronti mjaft të fuqishëm të ftohtë ajror, me erëra të ftohta veriore e veriperëndimore, reshje bore dhe ulje të ndjeshme të temperaturave. Në bazë të parashikimeve aktuale reshje bore priten në zonat ku tradicionalisht bjen më shumë borë, por kjo mund të ndryshojë. Reshje bore priten sidomos në Kosovë dhe disa vise të Shqipërisë dhe Maqedonisë së Veriut.
Pra, pas tri ose katër ditëve mjaft të ngrohta për këtë periudhë kohore, të premten fronti i ftohtë ajror sjellë ndryshim substancial dhe kushte dimërore atmosferike.. Temperaturat do të pësojnë ulje të mëtutjeshme edhe gjatë fundjavës ku vende-vende mund të paraqiten kushte për reshje të herëpashershme bore.
Ishte ky prashikimi javor i motit me pak fjalë. Ndryshime mund të ketë dhe për çdo ndryshim eventual do të njoftoheni në postimet tona të PËRDITSHME./MeteoBallkan
