Jemi në gjysmë të Shtatorit dhe thatësia po vazhdon me intensitet të lartë. Temperaturat po vazhdojnë të jenë mjaft të larta si pasojë e një vere të gjatë shumë të nxehtë dhe ekstremisht të thatë.
Edhe kjo javë do të karakterizohet me mungesë të madhe të reshjeve atmosferike.
Fronti i dobët i natës së kaluar solli shumë pak reshje dhe atë vetëm në disa rajone të izoluara, ndërsa temperaturat do të rriten menjëherë.
E Hëna dhe e Marta pritet të karakterizohen me mot kryesisht me diell. E Hëna pak më e freskët dhe me vranësira lokale, ndërsa e Marta me diell dhe mjaft nxehtë me temperatura madje pak mbi 30 gradë Celsius.
Fronti i ftohtë i mesjavës
Një front i dobët, i ftohtë ajror do të arrijë në mesjavë në Kosovë, Maqedoninë Veriore, Luginë dhe vetëm në disa pjesë të Shqipërisë kontinentale. Ky front nuk do të ndikojë pothuajse fare në Shqipërinë mesdhetare.
Fronti do të jetë i theksuar vetëm në aspektin termik do të shkaktojë ulje të temperaturave dhe atë vetëm në viset kontinentale. Në aspektin e reshjeve atmosferike fronti do të jetë shumë i varfër me lagështi, prandaj reshjet do të jenë të pakta apo krejtësisht simbolike.
Masat e fuqishme ajrore anticiklonike që po mbretërojnë një kohë të gjatë po ndikojnë në dobësimin e fronteve që po depërtojnë dhe të cilët po shkaktojnë reshje shiu në Ballkanin verior dhe veriperëndimor si dhe në pjesë të Ballkanit perëndimor.
Masat e thatë anticiklonike do të mbretërojnë në viset tona gjatë tërë javës së re duke pamundësuar reshjet atmosferike.
Pas frontit të ftohtë të mesjaves do të kemi një ditë ose dy të freskëta e Mërkura dhe e Enjtja kur do të ndjejmë uljen e ndjeshme të temperaturave, por pa reshje atmosferike apo me reshje simbolike në disa zona. Ulja e temperaturave do të ndjehet vetëm në Kosovë, pjesë të Maqedonisë së Veriut, veri të Malit të Zi dhe Luginë të Preshevës. Edhe në viset malore në veri dhe lindje të Shqipërisë.
Të premten do të kemi sërish rritje të temperaturave dhe kthimin në “normalitet veror”. Do të kemi diell dhe temperatura më të larta, por asgjë ekstreme. Fundjava pritet të jetë stabile dhe me diell. Në viset bregdetare do të jetë mjaft nxehtë me temperatura deri në 30 gradë Celsius.
Ishte ky parashikimi i motit për javën e re bazuar në ecuritë aktuale sinoptike. Ndryshime në parashikim mund të ketë dhe për çdo ndryshim eventual do të njoftoheni gjatë ditëve të javës./MeteoBallkan
