Masa gjigande ajrore anticiklonike janë strukturuar fuqishëm në Mesdhe dhe Afriken veriore e deri në territoret tona duke kushtëzuar mot stabil, të nxehtë dhe kryesisht me diell. Këto masa ajrore nuk lejojnë ardhjen e ndonjë mase të lagshtë nga Atlantiku që do të sillte reshje, prandaj deri në fund të këtij muaji nuk priten reshje atmosferike.
Në aspektin termik kemi masa mjaft të ngrohta ajrore nga Mesdheu që dominojnë deri të mërkurën me temperatura deri në 27 gradë Celsius në Kosovë e 30 në Shqipëri. Nga e mërkura masat gjigande ajrore anticiklonike zhvendosen edhe lindje të Evropes duke hapur rrugen e depërtimit të masave pak më të ftohta ajrore nga verilindja dhe në këtë mënyrë priten ulje graduale të temperaturave veçanërisht në zonat kontinentale.
Deri të mërkurën do të kemi rrymime ajrore nga jugu, juglindja e jugperëndimi dhe për këtë arsye do të jetë shumë nxehtë për këtë periudhë kohore. Të mërkurën do të fillojnë të fryjnë erëra nga veriu e verilindja dhe për këtë arsye do të ketë ulje të temperaturave, por jo ulje të theksuara.
Pra, edhe pse kemi ulje të temperaturave nga e mërkura ato ende mbesin relativisht të larta sidomos në viset Mesdhetare, por edhe në zonat kontinentale.
Edhe fundjava pritet të jetë kryesisht e qetë dhe stabil, me intervale të gjata kohore me diell dhe vranësira të pakta lokale dhe me temperatura maksimale rreth 20 gradë Celsius, prandaj shfrytëzoni këtë javë dhe fundjaven me mot krejtësisht stabil dhe të ngrohtë gjatë mesdites./MeteoBallkan
