Fronti i ftohtë që shkaktojë stuhi të fuqishme në pjesë të Evropes dhe veriperëndim të Ballkanit, megjithatë do të arrijë të destabilizojë të paktën pjesërisht atmosferën edhe në viset tona.
Një sasi më e vogël e ajrit jo-stabil do të arrijë të depërtojë edhe në territoret tona duke krijuar kushte për zhvillimin e disa stuhive me bubullima sidomos në zonat kodrinore-malore të Shqipërisë dhe Kosovës. Rrebeshe intensive priten në veri të Malit të Zi.
Kjo masë ajrore destabilizuese do të qëndrojë mbi viset tona ndoshta deri të Shtunën.
E Hëna ishte ditë plotësisht stabile, e nxehtë dhe me diell, ndërsa të Martën shihen disa shenja të vranësirave të cilat orëve të pasdites pritet të zhvillohen më fuqishëm duke krijuar kushte për rrebeshe lokale shiu me vetëtima, bubullimë dhe mundësi për breshër. Shumë më shumë probabilitet për rrebeshe shiu do të kenë viset kodrinore-malore, por orëve të mbrëmjes mund të ketë edhe në shumë zona të ulëta, megjithatë shumë zona tjera do të mbesin pa reshje, pra kemi të bëjmë me zhvillime tipike verore ku rrebeshet janë të përqëndruara në hapësira jo shumë të gjëra gjeografike.
Sipas disa modeleve më të paku rrebeshe priten në lindje të Kosovës dhe në viset bregdetare të Shqipërisë, ndërsa në viset tjera zhvillimet do të jenë më intensive, por të karakterit të kufizuar.
Në aspektin termik nuk priten ndryshime të theksuara të temperaturave, por normalisht në zonat e vranësirave dhe rrebesheve të shiut do të vjen freskimi i motit.
Paraditet zakonisht do të jenë me diell dhe vranësira lokale, ndërsa zhvillimet konvektive vijnë kryesisht orëve të pasdites dhe mbrëmje me rrebeshe lokale shiu me vetëtima, bubullimë dhe mundësi për breshër. Mund të ndodhin stuhi lokale edhe gjatë orëve të natës.
Mos prisni rrebeshe në të gjitha viset
Këto reshje do të ndikojnë në zbutje të lehtë të thatësirës në ato zona që kanë fatin të përfitojnë, por në shumë zona tjera që nuk do ta kenë këtë fat do të vazhdojë përkeqësimi i gjendjes me thatësinë verore. Është jashtëzakonisht e vështirë dhe pothuajse e pamundur të përcaktohet me saktësi precize zonat e sakta ku do të zhvillohen rrebeshet e shiut, por normalisht më shumë probabilitet kanë viset kodrinore-malore dhe vendet përreth.
Pra, një javë me diell dhe vranësira. Vranësirat orëve të pasdites dhe mbrëmjes do të kushtëzojnë stuhi lokale me vetëtima dhe bubullimë. Në disa zona mund të ketë breshër.
Stabilizim i atmosferës pritet ditën e Shtunë, por njëkohësisht pritet edhe depërtim i ajrit më të freskët nga veriu, prandaj fundjava vjen kryesisht me diell dhe stabile, por më e freskët sidomos në viset kontinentale, ngase në viset mesdhetare vera vazhdon pothuajse e papenguar, po nuk pritet ndonjë nxehtësi ekstreme.
Ishte ky parashikimi i motit për këtë javë. Ndryshime të vogla mund të ketë dhe ne do të mundohemi të jemi aktiv gjatë javës për të treguar për të rejat më të fundit./MeteoBallkan
