Pas shumë javëve të thata dhe me dominim të plotë anticiklonik, java që po hymë do të shënojë ndryshim të gjendjes sinoptike si pasojë e depërtimit të masave jo stabile ajrore me origjinë nga Atlantiku dhe fronteve të shpeshta të ftohta ajrore. Megjithatë temperaturat nuk do të shënojnë ulje sepse kemi të bëjmë me masa ajrore kryesisht të ngrohta dhe normalisht të lagështa.
Për shkak të masave ajrore të paqëndrueshme gjatë kësaj jave do të kemi edhe erëra sidomos të martën. Reshjet atmosferike do të jenë jashtëzakonisht të mirëseardhura por ende nuk do të jenë të mjaftueshme për zbutjen e thatësisë së madhe që ka kapluar rajonin tonë për një kohë të gjatë.
Pra, reshje shiu priten sonte gjatë natës dhe nesër, ndërsa nga e mërkura përsëri do të kemi reshje të herëpashershme shiu. Në viset kodrinore-malore do të ketë reshje të herëpashershme bore. Gjatë mesjavës nuk përjashtohet mundësia që reshjet e borës të paraqiten shkurtimisht edhe në disa ultësira të Republikës së Kosovës
Edhe në fundjavë pritet mot i paqëndrueshëm por relativisht i nxehtë, pra në përgjithësi këtë gjatë kësaj jave do të mbajë mot mjaft i ndryshueshëm me ulje-ngritje të shpeshta të temperaturave dhe reshje të herëpashershme.
Ishte ky një parashikim i motit për javën që po hymë me pak fjalë dhe gjatë kësaj jave mund të ketë ndryshime në parashikim për shkak të gjendjes mjaft të ndërlikuar sinoptike, por ne do tju njoftojmë për çdo ndryshim eventual në postimet tona të përditshme./Meteoballkan
