Karakteristikë kryesore e motit gjatë kësaj jave do të jetë paqëndrueshmëria atmosferike dhe me këtë nënkuptojmë mot mjaft të ndryshueshëm, me intervale kohore me diell dhe zhvillime të shpeshta të vranërave të shiut. Këto vranësira pritet të kushtëzojnë rrebeshe lokale shiu me vetëtima dhe bubullimë. Nganjëherë mund të kemi krijimin e ndonjë shtrëngate të fuqishme me breshër sidomos në orët e pasdites.
Reshje intensive priten gjatë dites së sotme, pastaj të mërkurën, të enjten dhe të premtën, ndërsa e marta na sjellë intervale shumë më të gjata kohore me diell. Normalisht këto reshje nuk do të jenë të balansuara, ngase shumë rajone pritet të kenë reshje intensive dhe gjasa edhe për vërshime, ndërsa rajone tjera mund të kenë reshje më të pakta, por në përgjithësi kësaj radhe priten reshje shumë më të përhapura. Gjatë mesit të javës stuhi shiu me bubullima priten edhe në bregdetin shqiptar.
Pra, para nesh një javë me mot shumë dinamik dhe të paqëndrueshëm. Gjatë fundjaves ka gjasa që të kemi stabilizim gradual të motit.
Në aspektin termik kjo javë pritet të jetë më e freskët dhe kjo nënkuptohet ngase me ardhjen e shiut dhe vranësirave temperaturat ulen, por në kohëm e intervaleve kohore me diell do të jetë zagushi./MeteoBallkan